ХРОНІКА АПОШНІХ ПАДЗЕЙ
У некаторых амерыканскіх штатах сур'ёзна задумаліся над тым, каб адмовіцца ад долара і ўвесці сваю ўласную валюту.
У прыватнасці, штат Паўднёвая Караліна працягвае палітыку, накіраваную на ўзмацненне незалежнасці ад федэральнага ўрада, піша газета "Справа". Сенатар-рэспубліканец Лі Брайт выступіў з заканадаўчай ініцыятывай увесці ў грашовае абарачэнне новую валюту. Паводле слоў Брайта, з'яўленне новых грошай дазволіць штату пазбегнуць сур'ёзных эканамічных страт у выпадку абвалу Федэральнай рэзервовай сістэмы ЗША пры наступленні чарговага фінансавага крызісу. "Раз людзі губляюць веру ў долар, нам варта падстрахавацца", — заявіў палітык у інтэрв'ю Hеrаld-Jоurnаl оf Sраrtаnburg.
У якасці аргумента Брайт прыводзіць пагрозу гіперінфляцыі, якая ўжо некалькі гадоў вісіць над амерыканскай эканомікай. Ён заклікае калег стварыць адмысловую камісію, якая вывучыць дэталі валютнага праекта і па выніках працы ўжо да 1 лістапада прадставіць справаздачу ўвазе Генеральнай асамблеі ў сенаце.
Прадстаўляючы свой праект грамадскай увазе, Брайт не забыўся згадаць, што Вірджынія і Джорджыя таксама разглядаюць магчымасць прыняцця аналагічных мер па абароне ад эканамічнай катастрофы. Праект Брайта не выглядае такім ужо нерэальным, калі ўзгадаць, што заканадаўства ЗША захоўвае за штатамі магчымасць выкарыстоўваць уласную валюту. Мяркуецца, што новыя амерыканскія грошы будуць выраблены з каштоўных металаў — золата ці серабра або абодвух адразу.
Заклікі пра дэцэнтралізацыю ўлады ў Амерыцы гучаць не так ужо рэдка. У красавіку 2009 года губернатар Тэхаса Рык Пэры заявіў, што яго штат можа задумацца пра аддзяленне ад ЗША, калі Вашынгтон не перастане "саваць нос" у мясцовыя справы. Падобныя настроі ўзмацніліся пасля прыняцця рэформы аховы здароўя, якая ў шэрагу штатаў была прызнана неканстытуцыйнай.
Патэнцыйнае зліццё з "МАЗам" падняло акцыі "КамАЗа"Акцыі расійскай аўтамабілебудаўнічай кампаніі "КамАЗ" падскочылі 15 лютага амаль на сем працэнтаў. Інвестары пачалі раскупляць каштоўныя паперы "КамАЗа" адразу пасля таго, як было абвешчана пра магчымае зліццё кампаніі з беларускім "МАЗам".
Пра патэнцыйнае зліццё абвясціў прэзідэнт "Растэхналогій" Сяргей Чэмезаў. Паводле яго слоў, Расія ўжо накіравала ў Беларусь прапанову пра абмен часткі "Камаза" на 100 працэнтаў "МАЗа".
Цяпер 49,9 працэнта "КамАЗа" належыць "Растэхналогіям". Блокпакет акцый прадпрыемства (27,3 працэнта) кантралюе інвесткампанія "Тройка Дыялог". Яшчэ адзін буйны пакет каштоўных папер знаходзіцца ў нямецкай Dаіmlеr (11 працэнтаў).