На каталіцкія Каляды ў Бабруйску і Мінску здарыліся міжнародныя бойкі

Сярод пераможцаў і збітых — беларусы, украінцы, грузіны, расіяне і азербайджанцы. У прамым эфіры бабруйскі турнір па баях без правілаў паказалі па тэлеканале "РТР-2". Пра тое, ці перамаглі беларусы, чытайце ў гэтым матэрыяле.

У запоўненым мінскім Палацы спорту 25 снежня прайшлі рэспубліканскія спаборніцтвы па змяшаных адзінаборствах. У народзе гэты від спорту называюць баямі без правілаў, хоць атлеты рызыкуюць здароўем не больш за хакеістаў і футбалістаў.

Для сябе я адзначыў вагавую катэгорыю 84 кг, дзе перамог вядомы футбольны фанат Раман Міраненка (мянушка — Хірург).

Але самае цікавае для дасведчаных спартыўных балельшчыкаў адбывалася не ў сталіцы, а ў горадзе Бабруйску. Тут, у гарадскім лядовым палацы, праходзіў цэлы міжнародны турнір РrоFС, які паказвалі як мінімум па двух замежных тэлеканалах — "РТР-2" і "Баец ТВ".

Руслан Каладко (злева) прабівае серыю свайму ўкраінскаму візаві.

Чаму федэрацыя РrоFС вырашыла правесці двубоі менавіта ў Бабруйску? Менавіта адсюль родам самы вядомы беларускі баец без правілаў Андрэй Арлоўскі (добры сябар Жан Клода ван Дама, Мікі Рурка і Фрэдзі Роўча; зараз жыве ў Чыкага). Арлоўскі заўсёды падкрэслівае, што ён родам з беларускага Бабруйска.

Яшчэ адзін вядомы бабруйчанін — Арцём Дамкоўскі, чэмпіён свету ў версіі M-1 Сhаllеngе.

Карацей, многія называюць Бабруйск байцоўскай сталіцай Беларусі. І такі імідж ахвотна падтрымлівае кіраўнік мясцовага гарвыканкама Дзмітрый Бонахаў.

Наш грузінскі госць Дзімітрый Рабакідзэ адпачывае пасля бітвы.

ле гэтым вечарам не ўсе гледачы былі задаволеныя выступам беларусаў. Наша каманда "Акадэмія ММА" з лікам 3:2 прайграла камандзе Nеfсhі (Азербайджан). Судзейства было звышпрынцыповым. І тое, што двубоі праходзілі на беларускай тэрыторыі, ніяк не паўплывала на вынік.

Каманда АЕ Tеаm (Пецярбург) з тым жа лікам прайграла клубу "Эльбрус" (Нальчык).

У іншых рэйтынгавых двубоях прымалі ўдзел не толькі беларусы, але і прадстаўнікі Грузіі, Дагестана і Асеціі.

Прыемна, што ў галоўным двубоі турніра вядомы ў свеце малады беларускі баец Руслан Каладко ("Акадэмія ММА", 76 кг) перамог балявым прыёмам моцнага ўкраінскага міжнародніка Сяргея Кавалёва.

Пасля заканчэння турніру я дзеля цікавасці наведаў раздзявальню байцоў і задаў пытанні Руслану Каладко.

— Пра вас піша самы аўтарытэтны міжнародны сайт у свеце змяшаных адзінаборстваў — shеrdоg.соm. Ці шмат грошай вы зарабляеце з дапамогай спорту?

<І>— Нашы адзінаборствы вельмі папулярныя ў Японіі, ЗША, Галандыі, але ў Беларусі яны пакуль не надта развіліся. Таму пакуль зарабляю я няшмат.

— Дык ці корміць вас спорт? Усё ж змяшаныя адзінаборствы выглядаюць небяспечна...

— Каб зарабляць на жыццё, я працую ў фірме, якая займаецца рамонтамі. А па вечарах трэніруюся.

— Вытрымаць такі рытм, напэўна, няпроста...

—У дадатак да гэтага я збіраюся паступаць у ВНУ. Сваю папярэднюю вышэйшую адукацыю я па маладосці так і не скончыў. Але ўсё лепшае, спадзяюся, наперадзе. Веру, што ў хуткім часе вы зможаце пабачыць мяне на топавых турнірах у ЗША, Японіі. Усіх беларусаў віншую з Новым годам і Калядамі...

Чытачам "Звязды" будзе цікава, што ўдарную тэхніку Руслану Каладко ставяць у сталічным байцоўскім клубе "Патрыёт", які паспяхова супрацоўнічае з "Акадэміяй ММА". Цікава, што кіраўніцтва "Патрыёта" збіраецца выпусціць пасля Новага года свой клубны сайт на беларускай мове.

Яўген ВАЛОШЫН.

Фота Крысціны Ласкі.