Транзіт газу праз Беларусь – сярод прыярытэтаў бяспекі ЗША

Інтэрнэт-сайтWikiLeaks абнародаваў спіс ключавых аб’ектаў, якія Вашынгтон лічыць «жыццёва важнымі» для нацыянальнай бяспекі ЗША. Газаправод Ямал-Еўропа, па якім праз Беларусь ідуць пастаўкі расійскага газу ў Еўропу, названы «найважнейшым газавым аб’ектам у свеце».

У лютым 2009 г. Дзярждэпартамент загадаў дыпламатычным місіям ЗША ў свеце падрыхтаваць спіс аб’ектаў інфраструктуры і ключавых рэсурсаў у свеце, «згуба якіх можа крытычна паўплываць на стан здароўя насельніцтва, эканамічную бяспеку і/ці нацыянальную бяспеку Злучаных Штатаў».

Спіс уключае падводныя кабелі, цэнтры камунікацыі, мінеральныя рэсурсы і кампаніі стратэгічнай важнасці ў краінах ад Аўстрыі да Новай Зеландыі.

WikiLeaks працягвае выкладаць у сеціва дыпламатычнае ліставанне ЗША. Вашынгтон асудзіў гэтую акцыю і распачаў крымінальную справу па факце выцечкі сакрэтнай інфармацыі.