Палітычны камітэт ПАРЕ 18 лістапада абмяркуе Беларусь

18 лістапада ў Парыжы адбудзецца чарговае пасяджэнне Палітычнага камітэта Парламенцкай асамблеі Савета Еўропы (ПАСЕ). У парадак дня пасяджэння камітэта ўнесена пытанне аб сітуацыі ў Беларусі.

Мяркуецца, што на пасяджэнні выступіць дакладчык ПАСЕ па Беларусі Сініка Хурскайнен, якая ў жніўні наведвала Беларусь з азнаямленчым візітам. Затым чакаецца дыскусія з удзелам старшыні камісіі па заканадаўстве і дзяржаўным будаўніцтве Савета Рэспублікі Нацыянальнага сходу Беларусі Яўгена Смірнова і сустаршыні партыі «Беларуская хрысціянская дэмакратыя» Віталя Рымашэўскага, які балаціруецца на пасаду прэзідэнта Беларусі.

Акрамя таго, у дыскусіі возьмуць удзел спецыяльны карэспандэнт «Народнай газеты» Андрэй Бабок і намеснік старшыні Беларускай асацыяцыі журналістаў Андрэй Аляксандраў.