Уладзіміра Асіпенку вызвалілі

Прадпрымальніка вызвалілі з Івацэвіцкай калоніі ўмоўна-датэрмінова — за 3 месяцы да заканчэння тэрміну пакарання.

Мікалай Аўтуховіч і Уладзімір Асіпенка (справа), фота Юліі Дарашкевіч.

«Вызвалілі мяне ўмоўна-датэрмінова, да заканчэння тэрміну мне засталося 3 месяцы і 4 дні. Не разлічваў на гэта, ніхто не прыходзіў, не казаў пісаць заяву, усё адбылося раптам і хутка.

У гэтым ваша заслуга — апазіцыі праваабаронцаў і незалежных журналістаў.

Мне паведаміў начальнік палітаддзела калоніі, што ўжо вельмі шмат скаргаў пайшло ў ДВП з нагоды таго, што мяне не вызваляюць. І мяне выклікалі спачатку на адну камісію, потым на другую, адбыўся суд, рашэнне было здавальняючым.

У пятніцу, а 17-й мяне вызвалілі, па мяне прыехала дачка», — распавёў Уладзімір Асіпенка charter97.org

На пытанне, як прайшлі ў гады ў зняволенні, несправядліва асуджаны Уладзімір Асіпенка кажа:

«Я вытрымаў. Мне ўсё гэта знаёма як чалавеку ваеннаму.

Вядома, паўсталі праблемы са зрокам, адным вокам аслеп на 50%, праблемы з зубамі.

Памятаю, як дзяжурны калоніі нам сказаў: хто атрымаў тэрмін больш трох гадоў, той страціць родных, сувязі і зубы», — кажа палітвязень.

Каментуючы прысуд Аўтуховічу Асіпенка зазначыў:

«Вядома, улады не маглі прызнаць сваёй паразы на судзе. Гэта справа замоўная.

Мне вядома, хто гэта зрабіў. Пазней скажу,

спачатку ўсё абдумаю, узважу. Ні я, ні Мікалай не здзяйснялі гэтага злачынства. У судзе справа развалілася, але яны не маглі гэтага прызнаць. Маглі бы і не садзіць нас у турму, маглі абмежавацца тым, што мы ўжо столькі адседзелі да суду. Артыкул, паводле якога нас абвінавацілі, прадугледжваў проста абмежаванне волі. Хацелі зламаць, але памыліліся, я ўсё вытрымаў.

Галоўная задача цяпер – Мікалай.

Я чытаў прэсу і згодны з ім: трэба патрабаваць завядзення крымінальнай справы супраць тых, хто вёў следства. Мяне трымалі 6 месяцаў па абвінавачванні ў падпале, якое не пацвердзілася ў судзе. Для такіх сьледчых у КК ёсць адпаведныя артыкулы. Гэта незаконныя і подлыя дзеянні», - упэўнены прадпрымальнік.

Умоўна-датэрміновае вызваленне абавязвае Уладзіміра Асіпенкі пастаянна адзначацца ў міліцыі і забараняе выязджаць за мяжу.

«Вельмі хацеў з"ездзіць у Кіеў на магілу сястры, якая памерла пакуль я быў у турме, але да лютага 2011 года я не магу выязджаць за межы краіны», - сказаў Асіпенка.

Гаворачы аб сваіх далейшых планах, былы палітвязень заяўляе, што

«не мае намеру сядзець, склаўшы рукі».

«Збіраюся актыўна ўдзельнічаць у апазіцыйнай дзейнасці. Склаўшы рукі, сядзець не буду. Людзі, якія схавалі нас за краты, павінны быць пакараныя», - кажа Асіпенка.

***

Былы вайсковец з Ваўкавыска Уладзімір Асіпенка праходзіў па адной справе з Мікалаем Аўтуховічам.

Асіпенку, як і Аўтуховіча, абвінавачвалі ў падрыхтоўцы тэрактаў супраць высокапастаўленых чыноўнікаў, але ў судзе гэта пацверджання не знайшло. Уладзімір Асіпенка, аднак, быў прызнаны судом вінаватым у незаконных дзеяннях са зброяй і атрымаў тры гады зняволення. Сваёй віны былы ваенны не прызнаў і казаў, што яму адпомсцілі за антыкарупцыйную дзейнасць і салідарнасць з Аўтуховічам. За кратамі Уладзімір Асіпенка знаходзіўся ад 8 лютага 2009 года.

Мікалай Аўтуховіч па такім жа сфальсіфікаваным, на думку праваабаронцаў, абвінавачванні прысуджаны да 5,5 гадоў пазбаўлення волі.