Звычкі, якія псуюць знешнасць
Што ў першую чаргу прыходзіць на розум пры словазлучэнні "шкодныя звычкі"? Курэнне, алкаголь. Але наўрад ці каму прыйдзе ў галаву, што шкодна, напрыклад, усміхацца.
І дарма: для знешнасці звычка пастаянна ўсміхацца нават вельмі шкодная, бо правакуе з'яўленне мімічных маршчын.
Звычка выціскаць вугры
Пры самастойных выцісканнях чорных кропак вугроў ёсць верагоднасць траўмаваць здаровыя тканкі, разнесці інфекцыю. Усё гэта непазбежна выкліча новы "прыступ" вугроў.
Як пазбавіцца? Праяўляць вытрымку, а лепш аддацца ў рукі прафесіяналаў. Калі вугроў шмат, перагледзець рацыён, выключыўшы прадукты-правакатары (алергены, прадукты з лішкам "хіміі"), схадзіць да дэрматолага і эндакрынолага.
Звычка жмурыцца, хмурыцца, моршчыцца
Шматлікія мімічныя рухі мы здзяйсняем рэфлекторна, і адсачыць іх практычна немагчыма. Адзін прывык хмурыць бровы, другі ў задуменні моршчыць лоб, трэці без канца падціскае вусны. У выніку індывідуальныя мімічныя звычкі кожнага даволі хутка адлюстроўваюцца на твары. Мімічныя маршчыны з'яўляюцца першымі — яны бываюць нават у падлеткаў.
Як пазбавіцца? Адзіны шанц — строгі кантроль. Альтэрнатыўны метад змагання для гультаяватых і багатых — ботакс. Пасля ін'екцыі міярэлаксанту цягліцы самі расслабяцца, так што нахмурыць лоб або прыжмурыць вочы будзе папросту немагчыма. Аднак праз паўгода-год эфект пройдзе і давядзецца зноў паўтараць працэдуру.
Змагацца з мімічнымі маршчынамі трэба комплексна: рэгулярныя візіты да касметолага (пілінг, масаж), кантроль над мімікай і ботакс пры неабходнасці.
Звычка чытаць лежучы
Маршчыны на шыі тым, хто прывык чытаць лежучы, забяспечаныя. Пры нязручным становішчы галавы скура на шыі збіраецца ў складкі, а паколькі яна ад прыроды тонкая, сухая і далікатная, то з часам ёй усё больш складана разгладзіцца. Маршчыны на шыі стараць нават мацней, чым маршчыны на твары, так што, чытаць лежучы — вельмі шкодная звычка.
Як пазбавіцца? Масіраваць шыю непажадана з-за блізкасці шчытападобнай залозы, ботакс таксама калоць не рэкамендуецца. Застаецца адно — чытаць седзячы.
Звычка чапаць твар
Многія незаўважна для сябе то шчаку падапруць, то нос пачухаюць, то за падбародак схопяцца. Шкода ад гэтага падвойная: пастаяннае расцягванне спрыяе з'яўленню дачасных маршчын, а калі рабіць гэта бруднымі або потнымі рукамі, то можна і інфекцыю занесці.
Як пазбавіцца? Выратуе, як і ў выпадку з мімікай, цвёрды самакантроль.
Звычка кусаць вусны
Па-першае, пакусаныя вусны выглядаюць неэстэтычна. Па-другое, у ранкі і мікратрэшчыны, якія ўзнікаюць падчас кусання, лёгка можа патрапіць бруд, што ў выніку прывядзе да запалення. Па-трэцяе, пакусаныя вусны не так проста нафарбаваць дэкаратыўнай памадай — яна толькі зробіць больш выразнымі ўсе дэфекты.
Як пазбавіцца? Выратаванне (акрамя ўжо звыклага самакантролю) можа прынесці ўсё тая ж дэкаратыўная памада, асабліва непрыемнага смаку — кусаць нафарбаваныя вусны досыць непрыемна.
Звычка грызці пазногці
Аніхафагіяй (грэцкае слова ад "оnух" — пазногаць і "рhаgеіn"— пажыраць) пакутуе кожнае трэцяе дзяця ва ўзросце ад 7 да 10 гадоў, палова падлеткаў і траціна дарослых, прычым пераважна жанчын. Некаторыя лічаць аніхафагію псіхічным захворваннем. Іншыя мяркуюць, што яна перадаецца ў спадчыну. Зрэшты, большасць спецыялістаў схіляецца да таго, што людзі, якія грызуць пазногці, проста больш трывожныя і часцей сустракаюцца са стрэсамі, чым астатнія. Аднак да канца праблема абгрызеных пазногцяў яшчэ не вывучаная...
Пазногці чалавека, які іх грызе, — сумнае відовішча: няроўныя, абкусаныя краі, пашкоджаныя куцікула і скура вакол пазногця, задзірыны, ранкі.
Як пазбавіцца? Камусьці дастаткова лёгкага самакантролю, камусьці дапаможа пару сеансаў у псіхатэрапеўта — часам бывае дастаткова ўсвядоміць, што менавіта прымушае чалавека грызці пазногці, і звычка знікае сама. Варыянты намазвання пазногцяў спецыяльным лакам або ёдам лічацца малаэфектыўнымі, таксама як і манера "грызці" сябе за тое, што вы грызяце пазногці.
Звычка сядзець нага за нагу
Гэтая звычка ёсць практычна ва ўсіх, у першую чаргу, у тых, хто праводзіць працоўны дзень седзячы. Прычым тут знешнасць? Успомніце пра варыкоз. Непрывабная сетка пашыраных вен на нагах — прамое наступства пераціскання крывяносных сасудаў і парушэння кровазвароту. Дарэчы, поза "нага на нагу" можа прывесці да застою крыві ў вобласці малога таза, што асабліва шкодна для жанчын (і вельмі шкодна для цяжарных).
Як пазбавіцца? Трэба купіць вельмі зручнае, якое падыходзіць менавіта вам, камп'ютарнае крэсла і завесці звычку пры любой магчымасці паднімаць ногі вышэй — на падстаўку, падлакотнік канапы і інш. Хутчэй за ўсё, целу спадабаецца новы ўзровень камфорту, і вы незаўважна для сябе перастанеце перакрыжоўваць ногі.
Падрыхтавала Ірына Пятровіч.