Актывісты антыатамнага руху ў Беларусі адпушчаны на волю

Два затрыманыя 23 верасня ў Мінску актывісты антыатамнага руху Беларусі Аляксандр Ярашэвіч і Алена Дубовік адпушчаны на волю.

Як паведаміў Ярашэвіч, сёння раніцай у кватэру, дзе ён жыве, з’явіліся супрацоўнікі міліцыі. Яны правялі агляд памяшкання, дапыталі Ярашэвіча і яго сяброўку Алену Дубовік наконт дачынення да нападу на расійскае пасольства, забралі камп’ютар, флэш-накапляльнікі і павезлі абодвух ва ўпраўленне па барацьбе з арганізаванай злачыннасцю Мінска. Паводле слоў Ярашэвіча, там іх дапыталі ў якасці сведак на прадмет таго, што ім вядома пра акцыю супраць ваенных вучэнняў, якая адбылася ў Мінску 19 верасня 2009 года. «Я растлумачыў, што мяне ў той дзень у Мінску не было, я ездзіў да бацькоў, таму нічога сказаць не магу», — адзначыў Ярашэвіч.

Пасля допыту ва ўпраўленні па барацьбе з арганізаванай злачыннасцю Ярашэвіча і Дубовік даставілі ў Цэнтральнае РУУС, дзе актывісты таксама былі дапытаны ў якасці сведак па факце згаданага інцыдэнту. «Дазнавальніка яшчэ таксама чамусьці цікавіла, ці ездзіў я на слуханні па беларускай АЭС у Астравец, ці ведаю я Уладзіміра Валодзіна з Беларускай партыі „Зялёныя“, ці наведваю сайты belarus.indymedia.org і belarus.avtonom.org, гэта значыць такія пытанні, якія непасрэдна да акцыі, што цікавіла міліцыю, дачынення не маюць», — адзначыў Ярашэвіч. Паводле яго слоў, пасля складання пратаколаў допытаў ён і Алена Дубовік вечарам былі адпушчаны.

Журналіст Аляксандр Ярашэвіч працуе ў інфармацыйна-выдавецкім агенцтве «ПастМедыя». Акрамя таго, ён быў членам інфармацыйнай групы, якая займаецца каардынацыяй паміж сваякамі і сябрамі анархістаў і эколагаў, затрыманых паводле падазрэння ў дачыненні да інцыдэнтаў каля пасольства Расіі ў Мінску і Цэнтра ізаляцыі правапарушальнікаў на вуліцы Акрэсціна.