Што дазволена Лукашэнку, не дазволена Няпомняшчых

Аддзел ЗАГС адміністрацыі Чыгуначнага раёна Гомеля адмовіў жыхару абласнога цэнтра Уладзіміру Няпомняшчых у выпраўленні даты нараджэння з 1 верасня на 31 жніўня.

8 верасня Няпомняшчых звярнуўся ў ЗАГС з просьбай перанесці дату яго дня нараджэння. «Хачу, каб у мяне быў дзень нараджэння ў адзін дзень з Колем Лукашэнкам і яго татам Лукашэнкам Аляксандрам Рыгоравічам», — растлумачыў мужчына. У заяве ў ЗАГС ён напісаў, што нарадзіўся 1 верасня 1952 года. «У гэты дзень, толькі ў 1939 годзе, пачалася Другая сусветная вайна. Ужо на працягу больш чым 50 гадоў гэтая падзея азмрочвае мой дзень нараджэння. Відаць, дае асадак пачатак страшнай крывавай трагедыі мільёнаў ні ў чым не вінаватых людзей», — адзначаў аўтар заявы.

Няпомняшчых хацеў бы адзначаць дзень нараджэння тады ж, калі яго святкуюць прэзідэнт і яго малодшы сын: «Якое гэта будзе для мяне шчасце — усведамляць, што ты таксама нарадзіўся 31 жніўня. Бо такое не кожнаму дадзена».

Як паведаміў БелаПАН Няпомняшчых, адмову змяніць дату нараджэння ЗАГС матываваў тым, што заяўнік не падаў дакументы, якія пацвярджаюць факт яго нараджэння 31 жніўня. Аддзел ЗАГС спасылаецца пры гэтым на шэраг нарматыўных і прававых актаў, у прыватнасці Кодэкс аб шлюбе і сям’і, шэраг пастаноў, указ прэзідэнта «Аб адміністрацыйных працэдурах, якія ажыццяўляюцца дзяржаўнымі органамі і іншымі арганізацыямі па заявах грамадзян».

«Адказ ЗАГС — адпіска, таму што я і не сцвярджаў, што ў мяне дзень нараджэння 31 жніўня, а прасіў перанесці з 1 верасня. У нас толькі адзін чалавек можа рабіць, што хоча, іншым, як відаць, не дазволена змяняць дзень нараджэння па жаданні», — сказаў Няпомняшчых.

Раней Аляксандр Лукашэнка змяніў дату свайго дня нараджэння з 30 на 31 жніўня.