А актывісты ўсё мацюгаюцца

20 верасня суд Цэнтральнага раёна Гомеля прысудзіў гомельскаму актывісту «Маладой Беларусі» Івану Зайцаву два штрафы ў памеры 25 базавых велічыняў кожны. Актывісту прад’яўляліся два абвінавачванні — у нецэнзурнай лаянцы ў грамадскім месцы й у супраціве міліцыянтам.

Івана Зайцава затрымалі людзі ў цывільным, калі ён узняў бел-чырвона-белы сцяг падчас святочнага канцэрта на Дзень Горада 11 верасня каля Лядовага палаца ў Гомелі. Пры затрыманні Івана патаўклі.

З суботы да панядзелка актывіст сядзеў у Гомельскім ізалятары часовага ўтрымання.

У панядзелак суддзя Дамненка заслухала сведкаў з абодвух бакоў — міліцыянтаў і сяброў затрыманага — і прыняла рашэнне пакараць Івана Зайцава штрафамі.