Патрыманыя iншамаркi ў Беларусi яшчэ больш патаннеюць

Цэны на патрыманыя аўтамабiлi ў Беларусi ўпадуць яшчэ больш. Такую думку выказала генеральны дырэктар Беларускай аўтамабiльнай асацыяцыi Людмiла Шабанава.

"Прапанаванне за апошнi час не зменшылася, а попыт застаецца дастаткова слабым, прычым як на патрыманыя, так i на новыя аўтамабiлi, — сказала яна. — А калi прапанаванне перавышае попыт, то цэны, зразумела, падаюць".

Акрамя таго, аказваюць дадатковы нацiск на рынак патрыманых аўтамабiляў умовы бяспошлiннага ўвозу iншамарак з Беларусi ў Расiю. Згодна з iмi, не падлягаюць мытнаму дэклараванню толькi аўтамабiлi, увезеныя ў Беларусь фiзiчнымi асобамi да 1 студзеня 2010 года. У гэтым выпадку яны маюць статус тавараў Мытнага саюза. Пры гэтым, каб прадаць аўтамабiль у Расii, неабходна таксама атрымаць пашпарт транспартнага сродку, а ён выдаецца толькi тым аўтамабiлям, якiя адпавядаюць экалагiчнаму класу Еўра-4 i Еўра-5. Таму iншамаркi, якiя не падпадаюць пад гэтыя катэгорыi, застануцца ў Беларусi. "Расiя спрабуе не дапусцiць увозу на сваю тэрыторыю патрыманых аўтамабiляў для перапродажу", — растлумачыла прадстаўнiк асацыяцыi.

Улiчваючы, што толькi за апошнiя паўгода фiзiчныя асобы завезлi ў Беларусь больш як 110 тыс. аўтамабiляў, рынак патрыманых аўтамабiляў сёння перапоўнены. Усё гэта акажа ўплыў на цэны.

У той жа час нейкага катастрафiчнага падзення на рынку не адбудзецца, паколькi ва ўрон сабе прадаваць будуць толькi тыя, каму трэба разлiчвацца па крэдытах. "Але гэта пакуль прыватныя выпадкi, а не агульнапрынятая практыка", — сказала Людмiла Шабанава.

Еўрапейскi экалагiчны стандарт Еўра-4 быў уведзены ў 2005 годзе. Аўтамабiлi, якiя выкарыстоўваюць рухавiкi гэтага класа, працуюць на бензiне Аi-92 i вышэй, у той час як машыны, якiя падтрымлiваюць стандарт Еўра-3, выкарыстоўваюць палiва Аi-76 i вышэй. Цяпер усе сусветныя вытворцы збiраюць аўтамабiлi, адпаведныя стандарту Еўра-4. Аднак далёка не ўсе беларусы набываюць за мяжой новыя аўтамабiлi: большасць увезеных фiзiчнымi асобамi транспартных сродкаў адпавядае класу Еўра-3.