Ротнага коннай паліцыі Вільні вербаваў КДБ Беларусі?
Затрыманне ротнага камандзіра муніцыпальнай коннай паліцыі пры Віленскім галоўным камісарыяце Лайманаса Банкаўскаса ў Беларусі выклікае падазрэнне не толькі ў яго блізкіх, але і ў супрацоўнікаў літоўскіх спецслужбаў.Ёсць меркаванне, што КДБ, падкінуўшы ў яго машыну наркотыкі, спрабаваў вербаваць гэтага супрацоўніка літоўскай паліцыі. Паведамляецца, што Банкаўскас, які знаходзіўся ў адпачынку, быў затрыманы 16 жніўня на мяжы Літвы і Беларусі, у Ашмянскім раёне. Аднак яго цешча сцвярджае, што Банкаўскаса затрымалі яшчэ ў нядзелю.
Банкаўскас жанаты з грамадзянкай Беларусі. Бацькі яго жонкі жывуць у Мінску. Аднак, даведаўшыся пра няшчасце, цешча прыехала ў Вільню, а яго жонка з сябрамі — у Беларусь.
Па словах цешчы Банкаўскаса, ён з сям’ёй планаваў ехаць да мора. Перад паездкай вырашыў купіць паліва ў Беларусі. Ён прапаноўваў ехаць разам і блізкім, аднак яны не захацелі. Калі Банкаўскас вяртаўся ў Літву, яго аўтамабіль правяралі не толькі мытнікі, але і супрацоўнікі спецслужбаў.
Калі літоўца папрасілі падняць капот, ён гэта зрабіў. У гэты момант ён знаходзіўся на вуліцы, не бачыў, што адбываецца ў салоне і ў багажніку.
У яго машыне знайшлі 45,5 грамаў метамфетаміна. Паліцэйскага затрымалі і зачынілі ў Гродзенскім следчым ізалятары. Яму пагражае пазбаўленне волі на тэрмін ад 3 да 7 гадоў.
Літоўскія спецслужбы здзівіла і тое, якія наркотыкі былі знойдзеныя ў Банкаўскаса, і іх колькасць. Для наркамана такая колькасць занадта вялікая, а для гандляра-аптавіка — замалая. Але самае дзіўнае, што ў Літву, па папярэдніх дадзеных, везлі сінтэтычны метамфетамін, які літоўскія злачынцы вырабляюць у вялікай колькасці і вывозяць у Скандынавію і Заходнюю Еўропу.
Кіраўнік Мытнай крымінальнай службы Саўлюс Урбанавічус сказаў наступнае:
«Не туды вёз. Метамфетамін вязуць з Літвы. З Беларусі да нас вязуць гераін, гашыш, а не метамфетамін. Нелагічна і дзіўна».
Аднак у сераду беларускія службоўцы паведамілі, што Банкаўскаса затрымалі, калі ён уязджаў у Беларусь. Пасля гэтага літоўскія паліцэйскія пачалі высвятляць, калі ж усё-такі быў затрыманы ротны коннай паліцыі. Па звестках цешчы Банкаўскаса, яго затрымалі, калі ён уязджаў у Беларусь. У такім выпадку ўсе лагічна. Аднак жанчына гэтаму не верыць: «Ён ехаў па паліва. Купіўшы яго ў Беларусі, ён бы зэканоміў 200 літаў. Калі б ён гандляваў наркотыкамі, то па паліва ў Беларусь яму не давялося б ездзіць. Не сумняюся, што гэта правакацыя».
У гэтую гісторыю не верыць і начальнік Банкаўскаса Альгімантас Мінкаўскас: «Я ў гэта не веру. Чакаем, калі ён вернецца».
У Вільні ходзяць чуткі, што цесць Банкаўскаса — былы супрацоўнік КДБ высокага рангу або вайсковец — цяпер прадпрымальнік. Нібыта КДБ мог зацікавіцца літоўцам і праз яго цесця.
Аднак цешча Банкаўскаса адмаўляе гэтыя чуткі. Па яе словах, яе муж служыў у савецкай арміі, быў маёрам, а пасля развалу СССР сышоў са службы, працаваў у кампаніях, якія гандлююць кампутарамі.
Цешча Банкаўскаса сцвярджае, што зяць настроены супраць наркотыкаў і наркагандляроў, таму жанчына не сумняецца, што наркотыкі яму «нахабна і груба падсунулі».