«Блакiтныя маланкi» ў амфiтэатры
Вiцебск рыхтуецца да святкавання Дня дэсантнiкаў 2 жнiўня. Для горада гэта асаблiва адметная дата, бо ўжо шмат год ён носiць ганаровы статус беларускай сталiцы паветрана-дэсантных войскаў. Цяпер iх ядром з’яўляецца 103-я асобная мабiльная брыгада пад камандаваннем гвардыi палкоўнiка Аляксандра Лычкоўскага.
Асаблiвую ўрачыстасць святу надае юбiлейная дата: сёлета «крылатая пяхота» адзначае 80-годдзе свайго нараджэння.
Дзень дэсантнiкаў па-вiцебску абяцае не мець аналагаў. На плошчы Свабоды выстраiцца баявая тэхнiка. Усе цывiльныя грамадзяне маюць магчымасць паспытаць гарачай дэсантнай кашы. Апафеозам падзеi стане святочны канцэрт, прысвечаны 80-годдзю паветрана-дэсантных войскаў. У Летнiм амфiтэатры, дзе нядаўна выступалi зоркi сусветнай велiчынi, замест блакiтных васiлькоў «Славянскага базара ў Вiцебску» нябесным блакiтам расквiтнеюць тысячы берэтаў дэсантнiкаў.