Ад пятніцы да пятніцы. Чытачы “НГ” пра тое, што прымусіла думаць і перажываць

Марат КЛІМАЎ, кандыдат гістарычных навук, навуковы супрацоўнік Інстытута гісторыі НАН Беларусі.

Выклікала занепакоенасць. Безумоўна, гэта “газавая вайна” паміж нашай краінай і Расіяй! Я мяркую, што прычыны дзеянняў “Газпрама” ў тым, каб купіць усе беларускія сеткі транзіту. У гэтым канфлікце Беларусь прадэманстравала сваю незалежнасць. У тым ліку і эканамічную. Але гэта зусім не значыць, што зараз нам трэба зачыняцца ад Расіі. Гэта нашы суседзі і велізарны рынак для збыту тавараў.

Засмуціла. З-за моцных навадненняў у Бразіліі загінулі 30 чалавек, а 50 тысяч засталіся без жылля. Гэта ж толькі ўявіце: вы ўзялі крэдыт і пабудавалі кватэру ў Мінску за 1000 долараў за квадратны метр, але тут налятае нейкая стыхія і ад вашага дома застаюцца толькі руіны! Да таго ж чалавечыя ахвяры — гэта незваротна. Таму прыродныя катаклізмы спрабую адчуць праз такую экзатычную прызму.

Узрадавала. Аказваецца, не ўсё ў нашым прагматычным жыцці паддаецца дакладным разлікам, і часам “галівудскія лаў-сторы” сапраўды адбываюцца. Шведская прынцэса Вікторыя ўзяла шлюб з простым трэнерам па фітнесу! Безумоўна, падобныя  гісторыі дазваляюць яшчэ раз падкрэсліць: наша жыццё — гэта дзіўная рэч і не заўсёды напісаныя “сцэнары” рэалізуюцца...

Уразіла. Выстава, прысвечаная Ірану, якая экспануецца ў Палацы мастацтваў. За спрэчкамі аб іранскай ядзернай праграме палітыкі схавалі ад нас цікавую і самабытную краіну. Калі я стаяў перад персідскімі дыванамі, узгадваў Самерсэта Маэма і думкі, якія ўкладае кожны ткач у свой твор. Уразіла, што мінімальны персідскі дыван складаецца з 1,5 мільёна вузельчыкаў, а колькасць вузельчыкаў на 1 квадратным сантыметры дасягае 121! Мы, беларусы, любім працу, і калі сутыкаемся з працалюбствам іншых, можам яго ацаніць як найлепшую якасць чалавечага жыцця. На жаль, сучасныя тэлемедыясродкі прапагандуюць нам зусім іншае, дзе ўзбагачае чалавека куля, а не добрасумленная праца...

Усхвалявала. Весткі з аўкцыёнаў, дзе маю ўвагу прыцягнулі два лоты. Адзін — карціна з аўтографам Льва Талстога, дзе пісьменнік у некалькіх радках даваў ацэнку чалавечай місіі на гэтым свеце. Другі — напісаная ад рукі песня Джона Ленана. Першы з лотаў быў прададзены ўсяго за 7 тысяч долараў, а другі — больш за мільён. Я не стаўлюся дрэнна да Джона Ленана, але яго дзейнасць і дзейнасць Льва Талстога — гэта зусім не супастаўляльныя велічыні.