Фестываль і горад упрыгожыла ДРУЖБА

28 мая ў Клімавічах урачыста адкрыўся Міжнародны фестываль дзіцячай творчасці "Залатая пчолка".

У раённы цэнтр на беларуска-расійскім памежжы прыехалі дэлегацыі з 18 краін: упершыню — з Таджыкістана, Арменіі, Германіі, Фінляндыі, Нарвегіі, Эстоніі і Бельгіі. Маладыя таленты спяваюць, танцуюць, малююць і майструюць. У фестывалі бяруць удзел больш за тысячу творчых дзяцей. Напярэдадні фестывалю ў Клімавічах вельмі дарэчы абнавілі "Дружбу": у гасцініцы, якая адкрылася пасля рэканструкцыі, цяпер дастойныя ўмовы для прыёму самых важных гасцей. Цяжка паверыць, што гэта будынак 1968 года, які яшчэ нядаўна не адпавядаў сучасным уяўленням людзей пра гасцінічны камфорт. Рэканструкцыя гасцініцы каштавала мільярд рублёў. Для гасцей у "Дружбе" ёсць 17 нумароў з усімі выгодамі, яны разлічаны на 27 чалавек.