Ці будзе адноўлена Бабруйская крэпасць?

- Адна з галоўных прычын прыпынення аднаўлення крэпасці - недахоп фінансавання праекта, - патлумачыў нам першы намеснік кіраўніцтва капітальнага будаўніцтва Бабруйска спадар Уладзімір Джум.
 

Усе фінансавыя праблемы зараз усклаліся на гарадскі бюджэт. Дарэчы, губернатар Магілёўскай вобласці выказаў думку, што на аднаўленне крэпасці наўрад ці будуць выдзелены сродкі з абласнога бюджэту. Таму зараз і ўзнікла такая праблема.
 

У Мінску зараз вядзецца падрыхтоўка ўсіх патрэбных для аднаўлення дакументаў, праводзіцца экспертыза і ўсе патрэбныя працэдуры.

Яшчэ адна акалічнасць, якая перашкаджае распачаць паўнавартасную працу - адсутнасць дакументаў з Маскоўскага вайскова-гістарычнага архіва. Для таго, каб займець іх копіі, трэба ехаць у Маскву і выбіраць патрэбныя. А за тое, каб зрабіць копію, трэба плаціць грошы, якіх кіраўніцтву камунальнага будаўніцтва і без таго не стае.

- Калі б уся дакументацыя была падрыхтавана, а фінансаў хапала, мы адбудавалі б аб’ект за гады паўтары, - кажа спадар Уладзімір.

Ці будуць запрашаць да супрацоўніцтва прыватных бізнэсоўцаў, пакуль не вядома. Але вядома адно - помнік гэткага кшталту варты таго, каб яго аднавілі.