Конкурс у ліцэі БДУ сёлета склаў 6,5 чалавека на месца

Агульны конкурс ў ліцэі Беларускага дзяржаўнага універсітэта сёлета склаў 6,5 чалавека на месца, што на 2,3 вышэй за леташні, паведамляе прэс‑служба БДУ.

Для паступлення ў ліцэй абітурыенты падалі 1.379 заяў.

Найбольшая колькасць заяў — 650 — прынята ў фізіка‑матэматычныя класы. Тут конкурс складае 7,5 чалавека на месца.

На паступленне ў хіміка‑біялагічныя класы зарэгістравалася 325 абітурыентаў, у філалагічныя — 250, а ў грамадазнаўчыя — 154.

У ліцэй БДУ маюць права паступаць навучэнцы, якія пастаянна жывуць на тэрыторыі Беларусі і атрымалі сёлета агульную базавую адукацыю. Уступныя экзамены ў ліцэі пройдуць 16 і 23 мая. Пераможцы рэспубліканскай алімпіяды (дыпломы І, ІІ і ІІІ ступені), што праводзілася Міністэрствам адукацыі Беларусі ў гэтым навучальным годзе, залічваюцца без папярэдніх іспытаў.

Сёлета ў ліцэй БДУ запланавана прыняць 240 навучэнцаў, з якіх будзе сфарміравана 12 дзесятых класаў па 20 чалавек.

БелаПАН