КДБ распачаў яшчэ адну крымінальную справу ў дачыненні да Байковай?

Паводле неафіцыйнай інфармацыі, Камітэт дзяржаўнай бяспекі распачаў яшчэ адну крымінальную справу ў дачыненні да старшага следчага па асабліва важных справах Генеральнай пракуратуры Беларусі Святланы Байковай. Паводле звестак БелаПАН, гэта адбылося пасля таго, як генпракурор Рыгор Васілевіч адмовіўся падаўжаць тэрмін утрымання сваёй падначаленай пад вартай пасля заканчэння двух месяцаў з моманту яе затрымання. Па якім артыкуле распачата справа, пакуль невядома.

Ці адпавядае гэтая інфармацыі сапраўднасці, у Камітэце дзяржбяспекі не кажуць. «Без каментароў», — заявіў начальнік цэнтра інфармацыі і грамадскіх сувязей КДБ Аляксандр Антановіч. А па заканадаўстве толькі гэтае ведамства можа каментаваць справу, якую расследуе.

Нагадаем, Святлана Байкова была затрымана супрацоўнікамі КДБ 25 лютага. Ёй інкрымінуецца некалькі саставаў злачынстваў, у тым ліку перавышэнне ўлады.

3 сакавіка генпракурор заявіў журналістам, што ў яго няма інфармацыі аб карыслівых ці маёмасных незаконных дзеяннях падначаленых. Пры гэтым ён дапусціў, што Байкова магла ўчыніць нейкія парушэнні працэсуальнага характару.

Пазней стала вядома, што генпракурор спрабаваў у судзе Цэнтральнага раёна Мінска абскардзіць рашэнне аб узяцці Байковай пад варту, аднак суд пагадзіўся з высновамі КДБ, а не Рыгора Васілевіча.

БелаПАН