Лукашэнка: Стварэнне аграгарадкоў у гэтай пяцігодцы будзе завершана

Пра гэта заявіў сёння Аляксандр Лукашэнка, наведваючы аграгарадок Язёры Чэрыкаўскага раёна Магілёўскай вобласці.

Усяго да канца пяцігодкі ў Беларусі будзе налічвацца звыш 1,5 тыс. аграгарадкоў. У будучым будуць прыводзіцца ў парадак буйныя вёскі, размешчаныя паблізу аграгарадкоў.

Як адзначыў прэзідэнт, у наступнай пяцігодцы асноўныя намаганні будуць сканцэнтраваны на развіцці ў краіне вытворчай базы.

Аграгарадок Язёры, які сёння наведаў Аляксандр Лукашэнка, быў першым створаным у краіне. Кіраўнік дзяржавы адзначыў, што яму падабаюцца менавіта такія аграгарадкі, дзе захаваўся дух вёскі. Акрамя таго, тут створаны ўсе ўмовы для нармальнага жыцця людзей: ёсць крама, дзіцячы сад, школа, камбінат бытавога абслугоўвання насельніцтва.

Паводле слоў кіраўніка дзяржавы, у Беларусі 30% насельніцтва пражывае ў сельскай мясцовасці, у свеце гэта колькасць складае 6 працэнтаў.

«Я хацеў бы захаваць гэтыя 30% сельскага насельніцтва, — сказаў ён. — Нам трэба захаваць вёску, гэта наша галоўная задача».

Размаўляючы з жыхарамі аграгарадка, прэзідэнт выказаў перакананне, што не дарэмна ў гэтыя раёны ўкладваліся сродкі, адраджаліся землі. Як было даложана кіраўніку дзяржавы, у Чэрыкаўскім раёне захваральнасць дзяцей ніжэйшая на 30 працэнтаў, чым у цэлым па вобласці, а дарослага насельніцтва — на 20 працэнтаў. За апошнія 5 гадоў быў выяўлены толькі адзін выпадак «бруднага» малака, які адзначаўся ў 2006 годзе. На пацярпелых ад аварыі на Чарнобыльскай АЭС тэрыторыях назіраецца добрая тэндэнцыя зніжэння радыеактыўнага забруджвання зямель. У некаторых рэгіёнах вядзецца работа па вяртанню выведзеных раней з сельгасабароту зямель.

Кіраўнік дзяржавы азнаёміўся з развіццём сацыяльнай сферы ў аграгарадку і раёне, мерамі, што прымаюцца па ліквідацыі наступстваў аварыі на ЧАЭС. Аляксандр Лукашэнка пабываў у Чэрыкаўскім філіяле СДЮШ алімпійскага рэзерву, дзе рыхтуюць будучых біятланістаў. Выхаванцы гэтай школы штогод становяцца пераможцамі і прызёрамі розных абласных і рэспубліканскіх спаборніцтваў. Адным з іх з’яўляецца бронзавы прызёр першынства свету 2009 года па біятлону Уладзімір Чапелін. Аляксандр Лукашэнка таксама наведаў Язёрскі яслі‑сад, дзе паразмяўляў з работнікамі і дзецьмі. Ад кіраўніка дзяржавы філіялу СДЮШАР перададзены наборы спартыўнага інвентару, а дзіцячаму саду — цацкі.

Таццяна Паляжай, БЕЛТА