АБЗАЦ

Беларусь плануе размясціць еўрааблігацыі ў маі. Пра гэта паведаміў міністр эканомікі Мікалай Снапкоў.

У Глыбокім пяцігадовы малы падстрэліў свайго трохгадовага брата. Дзеці вырашылі пагуляць з пнеўматычнай стрэльбай бацькі. Падчас агляду новай "цацкі" пяцігадовы хлопчык выпадкова стрэліў. Куля трапіла малодшаму брату ў руку.

Аршанскі школьнік пакончыў жыццё самагубствам, скочыўшы з 9-га паверха. 17-гадовы вучань 11-га класа, інвалід першай групы, збіраўся ў школу, але ўзняўся на лесвічны пралёт 9-га паверха свайго дома і скочыў з акна.

Чэкавая прыватызацыя ў Беларусі будзе працягнута. "Урад дасць яшчэ год падумаць і ўкласці чэкі ў ААТ", — сказаў старшыня Дзяржаўнага камітэта па маёмасці Георгій Кузняцоў. Цяпер у Беларусі абмен чэкаў "Маёмасць" на акцыі шэрагу прадпрыемстваў у аддзяленнях "Беларусбанка" можна правесці да 1 ліпеня 2010 года.

У нямецкім Аахене пастаўшчык мяса як звычайна прывёз у рэстаран адборныя мясныя прадукты і меў намер атрымаць 400 еўра за папярэднюю пастаўку. Гаспадар рэстарана, аднак, заявіў, што на гэты момант у яго няма грошай. Паміж мужчынамі разгарэлася спрэчка, якая скончылася тым, што пастаўшчык вырашыў забраць назад усё "сваё мяса". Ён спустошыў халадзільнікі і канфіскаваў нават тыя кавалкі, якія моклі ў марынадзе, смажыліся на патэльні або ў духоўцы. Аднак гэтага яму здалося недастатковым, і ён уварваўся ў залу рэстарана, дзе пачаў хапаць мяса прама з талерак наведвальнікаў, пакінуўшы 20 гасцей без вячэры.