Храм музыкі. Дзіцячая філармонія з’явіцца ў цэнтры Мінска ў 2011 годзе

Будаўнікі пачалі ўжо ўзводзіць падмурак, а да канца года завершацца агульнабудаўнічыя работы, пра гэта паведаміў дырэктар КУП “Мінская спадчына” Павел Шыкунец. Дарэчы, філармонія будзе стаяць на спецыяльнай пліце, якая абароніць яе ад вібрацыі метро. Аўтар праекта — вядомы архітэктар Сяргей Багласаў, пад кіраўніцтвам якога аднаўлялася Мінская ратуша. Філармонія размесціцца ва ўзноўленай царкве Святога Духа, якая стаяла паблізу ратушы да 1936 года, калі храм узарвалі. Знешні выгляд царквы будзе максімальна набліжаны да арыгінальнага, а спецыяльная падсветка падкрэсліць прыгажосць ляп-ніны і вітражоў.  Усе фрагменты, якія засталіся ад арыгінальнай царквы, папоўняць экспазіцыю, што размесціцца ў падвале філармоніі. Акрамя аркестравай пляцоўкі, аздобленай фрэскамі, у філармоніі з’явіцца арган.