Распіццё піва ў грамадскіх месцах будзе забаронена з 23 лютага

Распіццё піва і слабаалкагольных напіткаў у грамадскіх месцах будзе забаронена ў Беларусі з 23 лютага.

photo.bymedia.net

Гэта прадугледжана законам «Аб унясенні змяненняў і дапаўненняў у некаторыя кодэксы Рэспублікі Беларусь па пытаннях крымінальнай і адміністрацыйнай адказнасці», які афіцыйна апублікаваны ў сённяшнім выданні Нацыянальнага рэестра прававых актаў Беларусі і ўступіць у сілу праз месяц.

У прыватнасці, законам устанаўліваецца адміністрацыйная адказнасць за распіццё слабаалкагольных напіткаў і піва на вуліцах, стадыёнах, скверах, парках, у грамадскім транспарце і іншых грамадскіх месцах, акрамя тых, якія прызначаны для іх ужывання.

Штрафныя санкцыі будуць такія ж, як і за распіццё ў грамадскіх месцах спіртных напіткаў. Першы раз давядзецца раскашэліцца на суму да 8 базавых велічыняў (цяпер адна базавая велічыня складае Br35 тыс.).

Пры паўторным такім правапарушэнні на працягу года ўжо давядзецца заплаціць ад 2 да 15 базавых велічыняў.

Новым законам вызначаецца таксама адказнасць за выраб фізічнымі асобамі моцных алкагольных напіткаў, іх набыццё (за выключэннем тых, продаж якіх дазволены), набыццё самагону, паўфабрыкатаў для яго вырабу, брагі, захоўванне самагонных апаратаў, а таксама больш як 5 л самагону або 30 л брагі. Пад моцнымі алкагольнымі напіткамі і самагонам разумеюцца алкагольныя напіткі з аб’ёмнай доляй этылавага спірту 28 працэнтаў і больш. Таму ў аматараў хатняга віна і розных настоек для трывогі, відаць, няма прычын.