Мiншчына 22 снежня
Старшыня Мінаблвыканкама Леанід Крупец прымаў членаў Савета старэйшын
Гэта аб'яднанне, куды ўваходзяць былыя кіраўнікі вобласці, намеснікі старшынь аблвыканкама, начальнікі ўпраўленняў і каміэтаў, якія ў свой час унеслі вялікі ўклад у развіццё Міншчыны.
Сустрэча была святочнай, пераднавагодняй. Але пачалі з надзённага. Абмеркавалі сацыяльна-эканамічнае развіццё вобласці. Год быў складаны, праўда, не без руху. У рэгіёне захаваліся высокія тэмпы будаўніцтва – да канца года павінны здаць больш за мільён «квадратаў» жылля. Рэалізуюцца 40 інвестпраектаў, 15 з якіх – з удзелам замежнага капіталу.
Найбольш цяжка давялося прамысловасці рэгіёна. Але і тут, паводле кіраўніцтва вобласці, намецілася станоўчая тэндэнцыя. Галоўнае – мадэрнізацыя, выпуск запатрабаванай прадукцыі і пошук новых рынкаў збыту.
Прадпрыемствы сталічнага рэгіёна актыўна асвойваюць інтэрнэт-прастору
У вобласці стварылі віртуальную гандлёвую пляцоўку, дзе вытворцы i пакупнiкi кантактуюць памiж сабой. Як толькі бакі дамовіліся, за лічаныя секунды афармляюцца ўсе неабходныя паперы. Перавага інтэрнэт-стасункаў — у хуткасці і гандлі без пасярэднікаў, а значыць выніковы кошт тавара – будзе ніжэйшы.
Новы хірургічны комплекс Мінскай абласной дзіцячай клінічнай бальніцы прыме першых пацыентаў напачатку новага года
Будаўнікі завяршаюць мантажныя работы. Да 15 студзеня будзе ўстаноўлена абсталяванне. На хірургічны комплекс пайшло больш за 12 мільярдаў рублёў.
Зараз Мінская абласная дзіцячая бальніца аказвае дапамогу па 20 ўрачэбных спецыяльнасцях. Штогод пацыентамі клінікі становяцца 16 тысяч чалавек, больш за 60 працэнтаў з іх — сельскія жыхары.
Новы малочна-таварны комплекс узвялі ў Крупскім раёне
Суперферму у СВК «Шчаўры» будавалі згодна з прэзідэнцкай праграмай. Паводле яе, сучасныя «малочныя фабрыкі» павінны з'явіцца ў кожным раёне рэспублікі. Кошт «крупскага праекта» –18 мільёнаў рублёў. Разлічаны комплекс на 600 жывёл. Пакуль тут наладзілі пробную вытворчасць малака.
Прафесійнае свята ў энергетыкаў Беларусі
22 снежня 1920 года ў БССР зацвердзілі першы план электрыфікацыі. Тады на парадку дня было святло, зараз – энергазберажэнне. Толькі сёлета на Міншчыне рэалізавалі больш за 180 энергазберагаючых мерапрыемстваў. У асноўным гэта рэканструкцыя і будаўніцтва новых кацельняў, перавод ацяпляльных агрэгатаў на мясцовыя віды паліва, развіццё альтэрнатыўнай энергетыкі. Сапраўдным «экзаменам» для энергасістэмы рэгіёна сталі цяперашнія маразы. Буйных збояў не было. Значыць, падрыхтаваліся якасна і ў тэрмін.
Усяго ў энергасістэме мінскага рэгіёна працуюць больш за 14 тысяч чалавек. У Валожынскім раёне за святло, ваду, ацяпленне «адказваюць» 100 чалавек. Праца адказная, часам — небяспечная. Але цікавая, кажуць спецыялісты.
Шлюбы заключаюцца не толькі на нябёсах
Амаль 150 пасведчанняў аб стварэнні новай сям'і выдалі ў Навасадскай папраўчай калоніі №14 Барысаўскага раёна. Здараецца, за адзін дзень рэгіструюць да 10 і нават больш пар.
Знаёмяцца маладыя праз ліставанне. «Завочныя» адносіны, відаць, так абвастраюць пачуцці, што нявесты не звяртаюць увагі на «крымінальны пасаг» жаніхоў. А пакаранне тут нясуць за цяжкія і асабліва цяжкія злачынствы. Ды й пасля вяселля многім «новаспечаным мужам» даводзіцца яшчэ «дасіджваць».
Выстава жывапісу народнага майстра Сяргея Лебедзева адкрылася ў Крупках
У мясцовай мастацкай галерэі больш за 30 твораў мастака. У асноўным – пейзажы. Горы, цясніны, рэкі і вадаспады. Напісаў майстар тое, што ўбачыў на ўласныя вочы падчас турыстычных паходаў. Гэта яшчэ адно захапленне Сяргея Лебедзева. У творчых падарожжах ён абыйшоў усю Еўропу і Азію.
Самы кароткі дзень і самая доўгая ноч
22 снежня – дзень зімовага сонцастаяння. Нашы продкі лічылі — нябеснае свяціла зараз праходзіць ачышчэнне і 24 снежня выйдзе поўнасцю абноўленым. А светлавы дзень кожныя трое сутак будзе прыбаўляць адну-дзве хвіліны.