Цi доўга радыятарны завод будзе атручваць сталiцу?

Рэдакцыя атрымала адказы:

Ад намеснiка мiнiстра прыродных рэсурсаў i аховы навакольнага асяроддзя Г.В. Валчугi.

Яна пагаджаецца з тым, што нягледзячы на шэраг захадаў праблема забруджвання атмасфернага паветра заводам iснуе. Хоць ужо i зроблена нямала. Напрыклад, па прапанове мiнiстэрства i рэкамендацыях Беларускага нацыянальнага тэхнiчнага ўнiверсiтэта на прадпрыемстве пачынаючы з 1990‑х гадоў праведзена некалькi мадэрнiзацый i рэканструкцый. Гэта дазволiла скарацiць выкiды забруджвальных рэчываў больш чым на 500 тон.

На думку намеснiка мiнiстра, вырашыць гэту надзённую для жыхароў дамоў, якiя знаходзяцца ў зоне ўздзеяння завода, можа адна з наступных мераў:

‑ рэканструкцыя лiцейнай вытворчасцi з заменай адкрытых вагранак лiцейнага цэха радыятараў на вагранку закрытага тыпу i вагранак лiцейнага цэха катлоў, лiцейнага цэха коўкага i шэрага чыгуна на iндукцыйныя печы з мадэрнiзацыяй газаачышчальнага абсталявання;

‑ рэканструкцыя лiцейнай вытворчасцi з заменай усiх вагранак на iндукцыйныя печы з мадэрнiзацыяй газаачышчальнага абсталявання;

‑ вынас вытворчасцi чыгуналiцейных радыятараў за межы горада.

Намеснiк мiнiстра паведамiла, што галiновым планам мерапрыемстваў па рацыянальным выкарыстаннi прыродных рэсурсаў i аховы навакольнага асяроддзя Мiнiстэрства прамысловасцi i Планам дзеянняў па рацыянальным выкарыстаннi прыродных рэсурсаў i аховы навакольнага асяроддзя на 2006—2010 гады па Мiнску ў лiцейным цэху радыятараў, якi робiць асноўны ўнёсак у забруджванне атмасфернага паветра сталiцы, прадугледжана будаўнiцтва вагранкi закрытага тыпу з высокаэфектыўным газаачышчальным абсталяваннем. Цяпер распрацоўваецца праектна‑каштарысная дакументацыя.

Намеснiк мiнiстра таксама паведамляе, што Генеральным планам развiцця Мiнска вынас лiцейнай вытворчасцi чыгуналiцейных радыятараў не прадугледжаны.

Разам з тым, як вынiкае з рэагавання, Мiнпрыроды сумесна з Мiнпрамысловасцi, Мiнгарвыканкамам i кiраўнiцтвам ААТ «Мiнскi завод ацяпляльнага абсталявання» працягваюць пошук варыянтаў для вырашэння складанай сiтуацыi па мiнiмiзацыi i папярэджваннi выкiдаў забруджвальных рэчываў у атмасфернае паветра.

Ад першага намеснiка кiраўнiка адмiнiстрацыi Фрунзенскага раёна сталiцы А.А. Лукашэвiча. Хоць рэдакцыя публiкацыю на рэагаванне накiравала ў Мiнгарвыканкам.

А.А. Лукашэвiч даволi падрабязна паведамляе гiсторыю пытання, але ў канцы рэагавання адзначае, што санэпiдстанцыi ў мэтах паляпшэння экалагiчнай сiтуацыi ў Мiнску выйшлi з прапановай разгледзець розныя варыянты вырашэння праблемы, у тым лiку i вынас ААТ «Мiнскi завод ацяпляльнага абсталявання» за межы горада.