На Дрыбіншчыне шыльды населеных пунктаў зрабілі па‑расійску

Чаму ў Дрыбінскім раёне (Магілёўшчына) новыя ўказальнікі населеных пунктаў усталёўваюцца на расійскай мове, папрасіў патлумачыць мясцовую «вертыкаль» сябра Руху «За Свабоду» Андрэй Юркоў. Ён накіраваў пісьмовы зварот з гэтай нагоды ў Дрыбінскі раённы выканаўчы камітэт.

Андрэй Юркоў звярнуў увагу мясцовай адміністрацыі на тое, што ўва ўсіх суседніх раёнах назвы населеных пунктаў на шыльдах выкананы па‑беларуску. На іх фоне Дрыбіншчына кантрастуе.

У сваім адказе старшыня Дрыбінскага райвыканкаму П.І.Панасюга патлумачыў, што «ўсталяванне інфармацыйных знакаў адбываецца згодна з СТБ‑1140‑99 пункт 4.1.17, які кажа: «надпісы павінны наносіцца на беларускай або рускай мовах (пераважна на беларускай)». У сувязі з гэтым кіраўнік мясцовай вертыкалі паабяцаў, што «пры замене інфармацыйных знакаў, якія прыйшлі ў нягоднасць, новыя знакі будуць мець надпіс на беларускай мове».