102 чалавекі захварэлі на свіны грып у Беларусі

У Беларусі зарэгістравана 102 выпадкі захворвання на грып А (H1N1), паведаміла 8 лістапада ў эфіры Першага канала намеснік міністра аховы здароўя — галоўны дзяржаўны санітарны лекар Валянціна Качан.

Паводле яе слоў, у апошнія дні колькасць зваротаў грамадзян у сувязі з захворваннем на грып і ВРВІ скарацілася на 4—25% у залежнасці ад населеных пунктаў. «Разам з тым у асобных рэгіёнах сітуацыя застаецца пакуль напружанай», — адзначыла Качан.

«На фоне усіх вірусаў, якія мы сёння лабараторна пацвярджаем у тых, хто захварэў, у 102 выпадках, гэта тры сотых працэнта, назіраецца вылучэнне віруса грыпа А (H1N1)», — паведаміла намеснік міністра.

Яна падкрэсліла, што ў Мінску назіраецца «асаблівая сітуацыя», але «яна кантралюемая, і сёння нават у гэтым горадзе мы назіраем зніжэнне зваротаў грамадзян з нагоды гэтых захворванняў, прымаюцца ўсе захады».

Паводле інфармацыі Качан, назіраецца зніжэнне захворвання на вострыя рэспіраторныя інфекцыі сярод дзяцей. «Эфект разлучэння, у прыватнасці, працяг канікул, прыпыненне працы школ даў сёння, увогуле, добры эфект, і ў сувязі з гэтым мы прагназуем, што гэтая сітуацыя будзе стабілізавацца. Зніжэнне адбылося практычна з 56% да 39% ад агульнай колькасці хворых сярод дзяцей і дарослых», — заявіла галоўны дзяржаўны санітарны ўрач.

Качан паведаміла, што зараз прыпынена праца амаль 1.400 навучальных устаноў, у іх абвешчаны каранцін.

Гэтыя захады прымаюцца на месцах «тэрытарыяльнымі органамі выканаўчай улады па прадстаўленні санэпідслужбы і па ўзгадненні з Міністэрствам аховы здароўя».

Міністэрства, паводле слоў Качан, рэкамендавала надаць асаблівую ўвагу «прадухіленню захворванняў сярод цяжарных і дзяцей».

«У сувязі з гэтым цяпер іх ацэнка стану і планавыя кансультацыі праводзяцца дома», — адзначыла Качан.

На 4 лістапада было лабараторна пацверджана 85 выпадкаў свінога грыпу, на 1 лістапада — 59, на 30 кастрычніка — 39. У сямі памерлых ад пнеўманіі вылучаны вірус А (H1N1).