«Вертыкальшчыкаў» будуць судзіць за махінацыі з кватэрамі

Пра гэта паведаміў сёння журналістам галоўны пракурор Беларусі Рыгор Васілевіч, перадае БелТА.

«Можна нават казаць пра злачынную групоўку. Найбліжэйшым часам справа будзе перададзена ў суд. Былы намеснік старшыні Бабруйскага гарвыканкама Валеваты па-ранейшаму знаходзіцца ў вышуку. Сярод падазроных па справе праходзяць службовыя асобы Магілёўскай вобласці і Менгарвыканкама», - распавёў генпракурор.

У верасні гэтага года Генпракуратура ўзбудзіла крымінальныя справы супраць былога намстаршыні Бабруйскага гарвыканкама: па ч.3 арт. 424 «Злоўжыванне ўладай ці службовымі паўнамоцтвамі», ч.2 арт.431 «Даванне хабару», ч.3 арт.209 «Махлярства», ч.2 ар.285 «Стварэнне злачыннай арганізацыі або ўдзел у ёй».

Ён падазраецца ў тым, што з 2004 па 2008 гады стварыў і узначаліў злачынную арганізацыю, што займалася крадзяжамі грашовых сродкаў бабруйскага прадпрыемства «Камбінат жалезабетонных вырабаў» (усяго было выкрадзена Br756 млн.), у махлярстве, а таксама атрыманні ад грамадзян $711 тыс. і даванні хабараў пры размеркаванні жылля ў Менску.

Валеваты раней узначальваў «Камбінат жалезабетонных вырабаў». Пасля таго, як быў прызначаны намеснікам старшыні гарвыканкама, у яго засталіся сувязі на прадпрыемстве, а механізм крадзяжу быў даведзены практычна да дасканаласці. Грашовыя сродкі пераводзіліся на рахункі падстаўных фірмаў, здымаліся наяўныя грошы, а затым прысвойваліся.

Падазроны займаўся незаконнымі здзелкамі ў сферы нерухомасці. У Менску будаўнічая арганізацыя будавала жылыя дамы, а затым кватэры прадаваліся людзям па больш высокай цане, што было адлюстравана ў дакументах. Пры гэтым пакупнікі кватэр цалкам усведамлялі незаконнасць таго, што адбывалася і давалі хабары за «зніжку», што ім давалі. Па гэтым эпізодзе да крымінальнай адказнасці прыцягнуты 16 чалавек.