З рынку Заходнi эвакуявалi людзей
Учора наведвальнiкам i гандлярам давялося тэрмiнова пакiдаць тэрыторыю сталiчнага рынку "Заходнi": тут працавалi дзве групы размiнiравання, шукаючы падазроныя выбухованебяспечныя прадметы.
Як паведамiлi карэспандэнту "Звязды" ў аддзяленнi iнфармацыi i грамадскiх сувязяў ГУУС Мiнгарвыканкама, эвакуацыя людзей была праведзеная ў сераду пасля званка невядомай жанчыны. Апошняя а палове адзiнаццатай дня патэлефанавала на спецлiнiю "102" i паведамiла, што з 12.30 да 13 гадзiн на "Заходнiм" адбудзецца тэрарыстычны акт. Калi ж аператар паспрабавала высветлiць асобу невядомай, яна са словамi: "Не магу сябе назваць, баюся, што заб'юць" павесiла трубку.
Як высветлiлася пасля дэталёвага абследавання тэрыторыi рынку, "мiн" на рынку не было. Праваахоўнiкамi вызначана, што невядомая тэлефанавала з таксафона, якi размешчаны на тэрыторыi самога рынку "Заходнi". Цяпер супрацоўнiкi мiлiцыi вядуць пошук гэтай "жартаўнiцы".
Ігар ГРЫШЫН.