Пачаўся суд над удзельнікамі «паляўнічай справы»
Вярхоўны суд Беларусі 12 кастрычніка пачаў разгляд крымінальнай справы, вядомай як «паляўнічая», у дачыненні да службовых асоб МУС. Слуханні праходзіць у закрытым рэжыме.
Фігурантамі крымінальнай справы з’яўляюцца былыя начальнік галоўнага ўпраўлення па барацьбе з карупцыяй і эканамічнымі злачынствамі МУС Віктар Ермакоў, начальнік УБКіЭЗ УУС Гомельскага аблвыканкама Аляксандр Малаеў, начальнік УБКіЭЗ СН УУС Гомельскага аблвыканкама Дзмітрый Баранаў і начальнік АБКіЭЗ Жлобінскага РАУС Леанід Мінянкоў.
Усе яны абвінавачваюцца ў перавышэнні ўлады (арт. 426 КК).
У крымінальнай справе фігуруюць таксама іншыя грамадзяне, якія абвінавачваюцца ў незаконным паляванні (размова ідзе аб здабычы еўрапейскай рысі, занесенай у Чырвоную кнігу) і бяздзеянні службовых асоб. Справа аб незаконным паляванні і перавышэнні ўлады аб’яднаныя ў адну вытворчасць.
Упершыню беларуская грамадскасць даведалася аб «паляўнічай справе» 29 красавіка. На нарадзе, прысвечанай працы праваахоўных органаў, Аляксандр Лукашэнка паведаміў: «У поле зроку КДБ нядаўна трапіў начальнік аддзела па барацьбе з карупцыяй і эканамічнымі злачынствамі Жлобінскага РАУС Леанід Мінянкоў, які арганізаваў умовы для заняцця паляваннем, рыбалкай і яшчэ чымсьці. Устаноўлена, што ў 2003 годзе ён набыў і аформіў на падстаўную асобу сядзібу плошчай больш як два гектары на тэрыторыі Жлобінскага раёна, захапіўшы пры гэтым яшчэ больш за адзін гектар лясных угоддзяў, самавольна ўзвёў 14 пабудоў, абзавёўся зграяй з 29 пародзістых сабак і трыма дзікамі. Усю гэтую гаспадарку абслугоўвалі мясцовыя жыхары. На ўласнай базе рэгулярна праходзіла паляванне, рыбалка з удзелам кіраўнікоў, у тым ліку Беларускага металургічнага завода і высокапастаўленых службовых асоб органаў унутраных спраў, напрыклад начальніка галоўнага ўпраўлення па барацьбе з карупцыяй і эканамічнымі злачынствамі МУС Ермакова».
Начальнікі ўпраўленняў і аддзела па барацьбе з карупцыяй і эканамічнымі злачынствамі былі затрыманыя супрацоўнікамі КДБ у красавіку 2009 года. Да суда яны знаходзіліся пад арыштам у СІЗА КДБ. Віктар Ермакоў знаходзіўся пад падпіскай аб нявыездзе.
Згодна з матэрыяламі крымінальнай справы, Ермакоў абвінавачваецца ў тым, што ён даў указанне сваім падначаленым Малаеву, Баранаву і Мінянкову сабраць кампраметуючыя матэрыялы на супрацоўнікаў органаў дзяржбяспекі. Яго падначаленыя абвінавачваюцца ў тым, што перавышалі ўладу і праводзілі аператыўныя мерапрыемствы з мэтай збору кампрамату на супрацоўнікаў КДБ.
Перад арыштам Малаеў падрыхтаваў відэазварот да прэзідэнта Беларусі, які з’явіўся ў інтэрнеце пасля яго затрымання. У звароце Малаеў просіць прэзідэнта «спыніць бязмежжа КДБ у Гомельскай вобласці». З гэтай жа мэтай сваякі абвінавачваных міліцыянераў звярталіся неаднаразова да кіраўніцтва МУС, КДБ і пракуратуры, у Адміністрацыю прэзідэнта, у міжнародныя структуры.