ШЛЯХ ДА СВЯТЛА
Ваню Цэдрыку два годзiкi. Ён, як i ўсе дзецi ў гэтым узросце, любiць гуляць на дварэ, смяецца, плача, просiцца да матулi на рукi. На першы погляд — дзiця, як дзiця, сотнi i тысячы такiх маленькiх хлопчыкаў можна сустрэць кожны дзень. Але калi ўглядаешся ў яго вочы, разумееш, што нешта не так. Ваня не такi, як астатнiя. З самага свайго першага дня на гэтым свеце ён бачыць перад сабою толькi цемру. Дыягназ — татальнае адслаенне сятчаткi. На аперацыю тэрмiнова патрэбна вялiкая сума. Для бацькоў хлопчыка яна непад'ёмная.
У суботу, 17 кастрычнiка, новая веласiпедная траса ўздоўж Свiслачы стане пешаходнай. Хакейны клуб "Дынама-Мiнск" разам з Федэрацыяй хакея Рэспублiкi Беларусь арганiзуе дабрачынную акцыю па зборы сродкаў для Ванi. Кожны ахвотны можа пешшу прайсцi 30 кiламетраў трасы побач са старшынёй федэрацыi Уладзiмiрам Навумавым i галоўным трэнерам мiнскай каманды Глэнам Хэнланам. Перад пачаткам паходу будзе арганiзаваны продаж фiрмовых дынамаўскiх маек. Мiнiмальны кошт — 50 тысяч беларускiх рублёў. Максiмальны — не абмежаваны. Першымi пакупнiкамi маек стануць Навумаў i Хэнлан. Усе заробленыя сродкi пойдуць на Ваневу аперацыю. Пачатак акцыi ў 9:00 на перакрыжаваннi МКАД i ракi Свiслач каля вадасховiшча Дразды.
Мы ўсе марым аб вялiкiх дасягненнях, хочам дамагчыся высокiх пасад, зарабляць добрыя грошы. Часам усё ж трэба спынiцца. Азiрнуцца. Паглядзець у Ваневы вочы. Захацець, каб ён асэнсавана зiрнуў у адказ. Усё ў тваiх руках. Дабрыня — гэта тое, што можа пачуць глухi i ўбачыць сляпы...
Яўген ВАРАКСА.