Беларусаў запрашаюць... у Каралеўскi Альберт-Хол

 

Знакамiтая карпарацыя BBC з'яўляецца яго арганiзатарам з 1927 года, а заснаваны фестываль быў яшчэ раней, у 1895-м. Маштабны музычны форум доўжыцца цэлых восем тыдняў i складаецца з серыi так званых "праменадных канцэртаў", на якiя акрамя бiлетаў на звычайныя сядзячыя месцы прадаецца яшчэ мноства танных стаячых месцаў. Уласна, з гэтым i звязана назва "праменадны" — канцэрт, якi можна слухаць падчас прагулкi. Першыя падобныя мерапрыемствы праходзiлi ў лонданскiх парках, дзе публiка сумяшчала прыемнае з карысным — дыхала свежым паветрам i слухала выступленнi аркестраў. Цяпер жа праграма "BBC Proms" дзякуючы супрацоўнiцтву з Еўрапейскiм вяшчальным саюзам транслюецца ў дзясятках краiн i збiрае шматмiльённую аўдыторыю, а сам фестываль лiчыцца самым вялiкiм у свеце i самым дэмакратычным.

 

 

Сёлета да лiку "наведнiкаў" фестывалю далучацца i беларусы. 20 верасня Першы канал пакажа заключны канцэрт сезона "The Last Night of the Proms", якi, паводле задумкi арганiзатараў, найлепш адлюстроўвае дух фэсту: у канцэрце з двух аддзяленняў бяруць удзел лепшыя музыкi свету, а праграма аб'ядноўвае самыя папулярныя i новыя класiчныя творы. Сёлета, напрыклад, у закрыццi сезона бяруць удзел галоўнае дзейнае сапрана Вялiкабрытанii Сара Коналi i Элiсан Болсам, якая атрымала сусветнае прызнанне дзякуючы сваёй вiртуознай iгры на трубе. У суправаджэннi вядучага брытанскага сiмфанiчнага аркестра i хору BBC артысткi выканаюць творы Гайдна, Гендаля, Кнусена, Персела i iншых кампазiтараў.