Конкурс вызначыў лепшых

Раённы конкурс аператараў па штучным асемяненні кароў і цёлак, які праходзіў на базе райплемстанцыі і ў якім прынялі ўдзел 10 спецыялістаў гэтай прафесіі з усіх гаспадарак раёна, выявіў здольнасці кожнага і вызначыў лепшых.

На працягу больш як дзвюх гадзін аператары дэманстравалі свае веды па тэорыі: напісанне тэста, вядзенне журналаў па штучным асемяненні — і практыцы: падрыхтоўка рабочага месца, размарозка спермы і ацэнка яе якасці, уменне працаваць з мікраскопам. Пры агульным падліку балаў таксама ўлічваліся вынікі працы кожнага канкурсанта: атрыманне прыплоду і выхад цялят на 100 кароў.

Суддзі — выконваючая абавязкі намесніка генеральнага дырэктара па аднаўленні і племянной рабоце Магілёўскага дзяржплемпрадпрыемства Наталля Салановіч і вядучы заатэхнік-селекцыянер гэтага прадпрыемства Вера Балобіна — ацэньвалі работу аператараў па 100-бальнай шкале. У выніку першае месца дасталася Мікалаю Ляпко з ААТ “Турыно-агра”, які набраў 94,5 бала, другое — Алене Ваяводавай з ААТ “Глускае райаграпрамтэхзабеспячэнне” (89,7 бала), і трэцяй стала Таццяна Сталько з ААТ “Зара Камуны” з вынікам 87,9 бала. Дарэчы, Мікалай Ляпко набраў максімальную колькасць балаў (20) па тэстах, а Алена Ваяводава — 10 балаў па вядзенні журналаў. Пераможца і прызёры былі ўзнагароджаны дыпломамі Магілёўскага дзяржплемпрадпрыемства, а яшчэ кожны з іх атрымаў падарунак.

Праз некаторы час, дзесьці ў кастрычніку-лістападзе, адбудзецца такі ж конкурс, толькі абласнога маштабу, і пройдзе ён у Горках. Наш раён будзе прадстаўляць Мікалай Ляпко, якога не першы раз прызнаюць лепшым у раёне тэхнікам-асемянатарам кароў. Застаецца толькі пажадаць, каб ён стаў такім і ў вобласці.

Вольга ЧУЧВАЛ

Фота аўтара