МНС абнародавала звесткі пра чатырох загінулых ратавальнікаў

Міністэрства па надзвычайных сітуацыях Беларусі абнародавала звесткі аб чатырох ратавальніках, загінулых 11 мая пры тушэнні пажару на тэрыторыі Мінскага завода вылічальнай тэхнікі. Інфармацыя размешчана на афіцыйным сайце МНС.

Загінулыя — Вадзім Лесік, Дзмітрый Лоўдар, Андрэй Мухін і Юрый Сысой.

Старшы сяржант унутранай службы Вадзім Лесік, пажарны пажарнай аварыйна‑ратавальнай часці № 2 Фрунзенскага раённага аддзела па надзвычайных сітуацыях Мінскага гарадскога ўпраўлення МНС, 1977 года нараджэння. Адукацыя сярэдняя. У 1998 годзе скончыў Мінскі індустрыяльны тэхнікум па спецыяльнасці «тэхналогія сілікатных і тугаплаўкіх неметалічных матэрыялаў і вырабаў». У органах і падраздзяленнях па надзвычайных сітуацыях — з кастрычніка 2001 года, на пасадзе — з кастрычніка 2001 года. Жанаты, двое дзяцей.

Капітан унутранай службы Дзмітрый Лоўдар, начальнік варты пажарнай аварыйна‑ратавальнай часці № 2 Фрунзенскага раённага аддзела па надзвычайных сітуацыях Мінскага гарадскога ўпраўлення МНС, 1975 года нараджэння. Адукацыя вышэйшая. У 1997 годзе скончыў Вышэйшае пажарна‑тэхнічнае вучылішча МУС па спецыяльнасці »пажарная тэхніка і бяспека». У МУС, органах і падраздзяленнях па надзвычайных сітуацыях — з кастрычніка 1993 года, на пасадзе — са снежня 1997 года. Жанаты, адно дзіця.

Старшына ўнутранай службы Андрэй Мухін, старшы пажарны пажарнай аварыйна‑ратавальнай часці № 18 Фрунзенскага раённага аддзела па надзвычайных сітуацыях Мінскага гарадскога ўпраўлення МНС, 1969 года нараджэння. Адукацыя сярэдняя. У 1987 годзе скончыў Мінскае сярэдняе прафесійна‑тэхнічнае вучылішча № 34 чыгуначнага транспарту па спецыяльнасці «слесар‑электрык па рамонце электраабсталявання цеплавозаў». З лістапада 1987 года па снежань 1989 года праходзіў службу ва Узброеных сілах СССР. У МУС, органах і падраздзяленнях па надзвычайных сітуацыях — з сакавіка 1992 года, на пасадзе — са снежня 1995 года. Жанаты, двое дзяцей.

Старшы сяржант унутранай службы Юрый Сысой, пажарны пажарнай аварыйна‑ратавальнай часці № 13 Маскоўскага раённага аддзела па надзвычайных сітуацыях Мінскага гарадскога ўпраўлення МНС, 1978 года нараджэння. Адукацыя сярэдняя. У 1995 годзе скончыў СШ № 3 горада Стоўбцы Мінскай вобласці. Са снежня 1996 года па май 1998 года праходзіў службу ва Узброеных сілах. У МУС, органах і падраздзяленнях па надзвычайных сітуацыях — з сакавіка 1998 года, на пасадзе — з лютага 2002 года. Жанаты, адно дзіця.

Фота "Салiдарнасць"