"Прэзідэнт-атэль" адкрыўся ў Мінску

"Прэзідэнт-атэль" гатовы прыняць першых наведнікаў. Кіраўнік дзяржавы Аляксандр Лукашэнка, перарэзаўшы сімвалічную стужку, адкрыў учора гасцініцу, перадае БЕЛТА.

Кіраўніка дзяржавы азнаёмілі з функцыянальнымі магчымасцямі "Прэзідэнт-атэля", арганізацыяй яго работы. Аляксандр Лукашэнка агледзеў некалькі нумароў гасцініцы, кангрэс-хол "Мінск", залу пасяджэнняў, басейн, рэстараны, іншыя памяшканні. Прэзідэнт падрабязна пацікавіўся якасцю работ па рэканструкцыі гасцініцы, тэрмінам акупнасці.

Адзінаццаціпавярховы будынак "Прэзідэнт-атэля" быў узведзены на месцы гасцінічнага корпуса "Кастрычніцкая". Работы былі пачаты ў студзені 2011 года, заказчыкам рэканструкцыі выступіла рэспубліканскае ўнітарнае прадпрыемства "Атэль "Мінск", генеральнай падраднай арганізацыяй — турэцкая кампанія. Фінансаванне ажыццёўлена за кошт крэдытных сродкаў, прадастаўленых экспартным крэдытным банкам Турцыі "Цюрк Эксімбанк"  (85 працэнтаў ад агульнай сумы затрат) і ААТ "Ашчадны банк "Беларусбанк" (15 працэнтаў).

Як далажылі Прэзідэнту, цяпер гасцініца можа размясціць у два разы больш пастаяльцаў, чым ранейшая. Тут створаны ўсе ўмовы як для адпачынку, так і для правядзення розных афіцыйных, дзелавых мерапрыемстваў. "Прэзідэнт-атэль" дае магчымасць праводзіць у ім на высокім дзяржаўным узроўні мерапрыемствы па прыёме і абслугоўванні афіцыйных дэлегацый замежных краін, міжнародных арганізацый і дзелавых колаў, якія наведваюць Беларусь.   У гасцініцы ёсць кангрэс-хол на 600 месцаў, пяць канферэнц-залаў на 136 месцаў і дзве vір-залы на 105 месцаў, аснашчаныя мультымедыйнымі стэрэа- і канферэнц-сістэмамі, абсталяваннем для сінхроннага перакладу і правядзення відэаканферэнцый. У гасцініцы ёсць таксама тры рэстараны на 460 пасадачных месцаў, пяць бараў і чатыры банкетныя залы. Акрамя таго, у дадатковых карпусах размешчаны SРА і фітнес-цэнтры з плавальнымі басейнамі і саўнамі, начны клуб, падземны паркінг.

"Добрая, прыстойная гасцініца", — падагульніў Аляксандр Лукашэнка. Разам з тым Прэзідэнт звярнуў увагу на неабходнасць больш хуткага ўстаранення некаторых будаўнічых недапрацовак.

Кіраўнік дзяржавы таксама пакінуў запіс у Кнізе ганаровых гасцей. "У самым сэрцы Мінска вырас унікальны пяцізоркавы гасцінічны комплекс, які спалучае еўрапейскі камфорт з традыцыямі беларускай гасціннасці і ўтульнасці. Тут створаны ўсе ўмовы для зручнага пражывання гасцей нашай краіны, правядзення важных дзелавых сустрэч і перагавораў", — гаворыцца ў запісе. "Упэўнены, што калектыў вашай гасцініцы зробіць усё для таго, каб "Прэзідэнт-атэль" адпавядаў сваёй назве, стаў адной з адметных мясцін сталіцы, заваяваў міжнародны аўтарытэт і прызнанне. Няхай кожны, хто паселіцца ў новай гасцініцы, адчувае сябе ў гэтых цудоўных сценах, як дома, і з задавальненнем прыязджае сюды зноў і зноў", — адзначыў кіраўнік дзяржавы".