Аляксандр Лукашэнка раскрытыкаваў тэмпы работ па мадэрнізацыі дрэваапрацоўчых прадпрыемстваў Беларусі

Прэзідэнт Беларусі ўчора ў ходзе наведвання ААТ "Івацэвічдрэў" жорстка крытыкаваў тэмпы работ па мадэрнізацыі дрэваапрацоўчых прадпрыемстваў краіны, перадае карэспандэнт БЕЛТА.

Аляксандр Лукашэнка адхіліў ад работы генеральнага дырэктара ААТ "Івацэвічдрэў" Барыса Міхнюка. Кіраваць прадпрыемствам і наводзіць парадак на вытворчасці будзе Уладзімір Шульга, які да гэтага быў старшынёй канцэрна "Беллеспаперапрам".

Прэзідэнту паказалі новы сучасны цэх па вытворчасці драўнянастружкавых і ламініраваных пліт. Вытворчы працэс там поўнасцю аўтаматызаваны і адпавядае самым высокім сусветным стандартам.

Аднак яшчэ накіроўваючыся на прадпрыемства кіраўнік дзяржавы агледзеў з верталёта тэрыторыю старога завода ААТ "Івацэвічдрэў", які размешчаны непадалёку. Нават з паветра Прэзідэнт разгледзеў там шматлікія прыклады безгаспадарчасці. Таму пасля наведвання новага цэха ён адышоў ад запланаванай праграмы і накіраваўся на стары завод, дзе знайшоў крайнюю ступень беспарадку ў многіх вытворчых і бытавых памяшканнях. Усюды былі раскіданы вытворчыя адходы, смецце, у некаторых памяшканнях было выбіта шкло, не выконваліся элементарныя правілы бяспекі працы. Размаўляючы з работнікамі гэтага прадпрыемства, якія спыталі, што будзе ў далейшым з іх заводам, Аляксандр Лукашэнка сказаў: "Магу дакладна сказаць, такога завода, як цяпер, які месцамі ў сметнік ператварыўся, у вас дакладна не будзе. І гэта зробіце вы, магчыма, з новым дырэктарам. Трэба заўтра ва ўрадзе разгледзець пытанне — Шульгу накіраваць сюды дырэктарам завода, пакуль не навядзе парадак. А старога мы звольнім з заўтрашняга дня, таму што так ніхто не працуе".

"Я праверу ўсе прадпрыемствы. Тое, што правалілі гэту работу па розных прычынах, больш суб'ектыўных, і мы тры-чатыры разы пераносілі тэрміны, — гэта факт. Таму што бардак у ведамстве (канцэрне "Беллеспаперапрам". — Заўвага БЕЛТА). Так не працуюць. Таму я яшчэ буду думаць, як з вамі ў гэтым плане разбірацца", — падкрэсліў кіраўнік дзяржавы.

"Тое, што будаўнікі вельмі дрэнна працуюць, гэта вы ўжо самі разбярыцеся ва ўрадзе разам з усёй будаўнічай галіной, — запатрабаваў Аляксандр Лукашэнка. — Мне гэтыя вашы казкі і пераконванні абсалютна не патрэбны. Пачынайце працаваць. І тут будаўнікі правалілі".

"Майце на ўвазе, у мяне на кантролі ўсе пытанні і даручэнні, і я іх за будучы год асабіста пракантралюю. Гэта першая строгая размова. Далей я з вамі размаўляць не буду. Прыйшоў, убачыў, што не так, значыць, збірайцеся і адразу куды-небудзь ідзіце. Майце на ўвазе, ні на якую камерцыйную фірму вы не паступіце: будаўнік — пойдзе замешваць цэмент, паперу ўмееш рабіць — будзеш стаяць каля станка", — падкрэсліў Прэзідэнт. "Таму я вам раю ўзяцца за справу і вырваць усе гэтыя аб'ёмы", — запатрабаваў Аляксандр Лукашэнка.

Кіраўнік дзяржавы таксама звярнуў увагу, што ёсць факты неналежнага захоўвання дарагога абсталявання, якое набывалася да ўводу ў строй вытворчых памяшканняў: "Не дай бог, я ўбачу, што вы купілі абсталяванне, а яно ляжыць пад адкрытым небам".

Акрамя ТАА "Івацэвічдрэў" інвестыцыйныя праекты і мадэрнізацыя ажыццяўляюцца яшчэ на васьмі прадпрыемствах канцэрна "Беллеспаперапрам". Гэта ААТ "Барысаўдрэў", ААТ "Віцебскдрэў", ААТ "Гомельдрэў", ААТ "Мастоўдрэў", ААТ "Рэчыцадрэў", ААТ "Магілёўдрэў", ААТ "ФанДАК" і РУП "Мазырскі ДАК". Як далажылі кіраўніку дзяржавы, прычыны зацягвання тэрмінаў рэалізацыі інвестпраектаў у асноўным адны і тыя ж. Спачатку каля 1,5-2 гадоў выбіралі, у каго купляць абсталяванне, якія выкарыстоўваць тэхналогіі. Потым паўстала пытанне фінансавання, у тым ліку прыцягненне замежных крэдытных ліній, атрыманне гарантый урада. Таксама з-за розных прычын зацягваліся тэрміны будаўніцтва. "Як можа кіраўнік прадпрыемства, міністр працаваць і не ведаць, які завод лепшы ў свеце. Як можна так працаваць?! — выказаў абурэнне Прэзідэнт. — Вы павінны ведаць усё самае лепшае і перадавое. Гэта проста адгаворкі, казкі. Якія паўтара-два гады. Гэта расхлябанасць і бязладнасць".

"Я вельмі незадаволены работай урада па мадэрнізацыі дрэваапрацоўчых прадпрыемстваў і раю навесці на старых прадпрыемствах парадак", — сказаў Аляксандр Лукашэнка.

Аляксандр Лукашэнка наведаў новы цэх ААТ "Івацэвічдрэў" па вытворчасці драўнянастружкавых і ламініраваных пліт магутнасцю 250 тыс. куб.м у год. Гэта сучаснае прадпрыемства, на якім вытворчы працэс поўнасцю аўтаматызаваны. Рэалізацыя гэтага інвестпраекта дасць магчымасць нарасціць пастаўкі на экспарт і павысіць выручку ад рэалізацыі прадукцыі. На стварэнне новай вытворчасці пайшло амаль 158 млн еўра, у тым ліку крэдыты банкаў, уласныя сродкі прадпрыемства, бюджэтныя рэсурсы.

Прэзідэнт актыўна цікавіўся тэхналагічным працэсам вытворчасці, агледзеў тэрыторыю прадпрыемства.

Размова таксама ішла аб магчымасці арганізацыі на ААТ "Івацэвічдрэў" мэблевай вытворчасці, на якой будзе выкарыстоўвацца вырабляемая прадукцыя. Да гэтага праекта плануецца падключыць і фабрыку ў Ружанах, на якой пасля мадэрнізацыі будуць вырабляцца некаторыя камплектуючыя для мэблі. Новая мэблевая вытворчасць можа пачаць працаваць ужо праз два гады.

"Нам трэба дыверсіфікаваць эканоміку. Мы сёння працуем на сыравіне дзядзькі з-за мяжы, а трэба на сваёй сыравіне працаваць. Лес — гэта наша багацце. Таму мы мадэрнізуем гэтыя прадпрыемствы", — сказаў Прэзідэнт.

Закрануў кіраўнік дзяржавы і сацыяльную тэматыку. Паводле яго слоў, дапамогу ў набыцці жылля дзяржава будзе аказваць у першую чаргу шматдзетным сем'ям. "Будзе больш грошай — мы больш прафінансуем тых, хто нараджае траіх ці больш дзяцей. Гэта перш за ўсё", — заявіў кіраўнік дзяржавы.

Адзін з маладых работнікаў прадпрыемства спытаў у Прэзідэнта аб магчымасцях дзяржаўнай падтрымкі пры будаўніцтве жылля. Аляксандр Лукашэнка растлумачыў, што высокія працэнтныя стаўкі па крэдытах абумоўлены тым, што банкі таксама пад высокі працэнт прыцягваюць грошы насельніцтва і прадпрыемстваў. Існуе таксама льготная чарга на жыллё, дзе працэнтныя стаўкі па крэдытах значна ніжэйшыя, але гэта таксама кладзецца дадатковай нагрузкай на бюджэт. "Гэта значыць, трэба падаткі ў некага ўзяць. Вось у чым праблема. Так, раней было шмат шалёных, танных крэдытаў. Мы дакрэдытаваліся да таго, што давялося дэвальваваць нацыянальную валюту. Я не хачу, каб гэта паўтарылася", — сказаў Аляксандр Лукашэнка. Пры гэтым Прэзідэнт адзначыў, што дзяржава і ў далейшым будзе падтрымліваць асобныя катэгорыі грамадзян у пытаннях набыцця жылля, і асабліва гэта датычыцца шматдзетных сем'яў.

Як далажыла мясцовае кіраўніцтва, у прыватнасці, па Івацэвіцкім раёне, тэрмін чакання па льготнай чарзе складае не больш як 2-3 гады.

Гаворачы ў цэлым аб шляхах павышэння дабрабыту жыхароў Беларусі, Аляксандр Лукашэнка зрабіў акцэнт на развіцці экспартаарыентаваных прадпрыемстваў, завязаных на мясцовую сыравіну. "Трэба зарабляць, больш вырабляць і прадаваць на экспарт", — сказаў ён.