Выбары па байкотнай акрузе ў Мінску правальваюцца

Як паведамляе прэс-служба Руху "За свабоду", на 16.00 яўка на Фрунзенскай выбарчай акрузе №101 у Мінску, дзе ладзіцца кампанія актыўнага байкоту і максімальна актыўнага назірання, склала, па дадзеных незалежных назіральнікаў, меней за 30%.

Зрэшты, зусім не факт, што такімі ж будуць і афіцыйныя дадзеныя. Так, па выніках датэрміновага галасавання (18-22 верасня) розніца паміж афіцыйнымі лічбамі і колькасцю прагаласаваўшых, палічаных фізічна назіральнікамі, была 3153 чалавек, або 5%.

Дарэчы, апошнія навіны "байкотнай" акругі выклікаюць трывогу. Пачала знікаць сувязь з назiральнiкамi. Так, на дадзены момант не адказваюць тэлефоны Арыны Лiсецкай i Сяргея Марцалева. А вось сайт Руху "За свабоду", адключаны ў абед, нарэшце запрацаваў.