Аляксандр Лукашэнка патрабуе большай эфектыўнасці ад вырошчвання сельгаскультур
Прэзідэнт Беларусі Аляксандр Лукашэнка патрабуе большай эфектыўнасці ад вырошчвання сельгаскультур. Такую задачу ён паставіў учора, наведваючы з рабочай паездкай Гомельскую вобласць, перадае БЕЛТА.
Гаворачы аб Гомельскай вобласці, Аляксандр Лукашэнка акцэнтаваў увагу на эфектыўнасці вырошчвання збожжавых культур. На думку Прэзідэнта, з тых плошчаў, якія засяваюцца ў гэтым рэгіёне, можна з лёгкасцю збіраць паўтара мільёна тон ураджаю, а за кошт прымянення эфектыўных тэхналогій — і два мільёны тон. Пакуль жа Гомельская вобласць не выходзіць на такія паказчыкі.
Як далажыў кіраўніку дзяржавы губернатар Гомельскай вобласці Уладзімір Дворнік, сярод збожжавых культур найбольш выгадна вырошчваць азімыя. Так, па выніках мінулага года рэнтабельнасць іх вырошчвання склала 6 працэнтаў. Таму ўпор у Гомельскай вобласці, улічваючы яе кліматычныя ўмовы і патэнцыял, неабходна рабіць менавіта на азімыя культуры, упэўнены губернатар. Кіраўнік дзяржавы паставіў задачу да канца года вызначыцца з тым, якія культуры найбольш аптымальна вырошчваць менавіта на землях Гомельскай вобласці, каб яны давалі максімальную эфектыўнасць. Аляксандр Лукашэнка высока ацаніў прафесійныя якасці гомельскага губернатара. Прэзідэнт лічыць, што Уладзімір Дворнік можа вывесці вобласць на больш высокія паказчыкі па зборы збожжавых культур. "Гомельшчына сёння ў гэтым плане адстае. Хоць па іншых напрамках, такіх як меліярацыя, вырошчванне новых культур, з'яўляецца прыкладам для іншых рэгіёнаў".
Беларусь да 2015 года павінна поўнасцю забяспечваць сябе сланечнікавым алеем. Такую задачу паставіў Прэзідэнт Беларусі Аляксандр Лукашэнка, наведваючы КСУП імя Кутузава Калінкавіцкага раёна Гомельскай вобласці. Як было даложана кіраўніку дзяржавы, краіне неабходна 50 тыс.т сланечнікавага алею, каб цалкам замяніць імпарт гэтай прадукцыі. "Калі мы ўмеем вырошчваць сланечнік і гэта нам трэба, то давайце пашырацца", — сказаў Прэзідэнт. "Трэба выходзіць на вытворчасць 50 тыс.т сланечнікавага алею, тым больш гэта рэнтабельна", — дадаў ён.
Што датычыцца іншых алейных культур, то ў гэтым годзе будзе атрымана каля 20 тыс.т соі, якая ў асноўным выкарыстоўваецца для фуражных мэт. У невялікіх аб'ёмах у Беларусі вырабляецца і льняны алей, праўда, ён не карыстаецца вялікай папулярнасцю ў насельніцтва. Прэзідэнту прадставілі выстаўку прадукцыі, якая вырабляецца прадпрыемствамі алейна-тлушчавай галіны Гомельскай вобласці: шырокі асартымент алею, маянэзу, маргарыну, а таксама мыла. Кіраўніку дзяржавы прадэманстравалі абсталяванне, якое выкарыстоўваецца для ўборкі сланечніку. Цяпер для гэтых мэт выкарыстоўваюцца прыстаўкі да камбайнаў і жняяркі, што закупляюцца ва Украіне. Такое абсталяванне дае магчымасць максімальна мінімізаваць страты пры ўборцы гэтай сельгаскультуры. Аляксандр Лукашэнка пацікавіўся, чаму Беларусь не вырабляе іх у сябе. Як адзначыў першы віцэ-прэм'ер Уладзімір Сямашка, Беларусь мае патрэбу ў невялікай колькасці такіх жняярак, аднак калі ў іх ёсць неабходнасць, то прадпрыемства гатова пачаць іх вытворчасць.
У 2012 годзе пасяўная плошча сланечніку ў краіне склала амаль 21 тыс.га, пры гэтым амаль усе землі сканцэнтраваны ў Гомельскай вобласці. Вытворчасцю сланечніку займаюцца 185 гаспадарак. У гэтым годзе айчыннымі сартамі (гібрыдамі) засеяна ўсяго 2,2 тыс.га (10 працэнтаў усёй плошчы). У 2013 годзе іх плошчу плануецца павялічыць да 5 тыс.га. Паводле ацэнкі Мінсельгасхарча, чаканы аб'ём вытворчасці алейнага сланечніку складзе каля 30 тыс.т. З гэтага семя плануецца атрымаць 12 тыс.т сырога сланечнікавага алею і каля 17 тыс.т шроту. Аднак такіх аб'ёмаў, каб закрыць патрэбы краіны, недастаткова. Для развіцця жывёлагадоўлі Беларусь вымушана будзе закупіць у 2012-2013 гадах неабходную колькасць расліннага бялку ў выглядзе сланечнікавага шроту ў аб'ёме 540,7 тыс.т і соевага — 327,7 тыс.т. Да 2015 года плануецца пашырыць пасяўныя плошчы пад сланечнік да 29 тыс.га.
Рэнтабельнасць прадукцыі, што вырабляецца на адзінай на постсавецкай прасторы вытворчасці грыбоў шыітаке (камбінат "Усход" у Калінкавіцкім раёне) складае больш за 20 працэнтаў. Аб гэтым праінфармавалі Аляксандра Лукашэнку ў час яго наведвання гэтага сельгаспрадпрыемства.
Як расказаў дырэктар камбіната "Усход" Дзмітрый Корж, грыбы шыітаке даюць магчымасць вырабляць разнастайную канкурэнтаздольную прадукцыю, у тым ліку кетчупы, соусы, якія карыстаюцца вялікім попытам.
Тэма вытворчасці, перапрацоўкі агародніны і грыбоў на аснове выкарыстання мясцовай сыравіны, пытанні імпартазамяшчэння былі асноўнымі ў час наведвання Прэзідэнтам камбіната "Усход". Кіраўнік дзяржавы азнаёміўся з тэхналагічнымі працэсамі вырошчвання, кансервавання грыбоў і агародніны. Яму таксама была прадстаўлена выстаўка кансерваванай агародніннай прадукцыі, якая вырабляецца ў Гомельскай вобласці.
На камбінаце "Усход" вырошчваюць каля 30 найменняў агароднінных культур на плошчы 435 га. У гаспадарцы пабудавана сучаснае бульбаагароднінасховішча ёмістасцю 20 тыс.т, якое аснашчана сучаснымі тэхналагічнымі лініямі для дапрацоўкі і перадрэалізацыйнай падрыхтоўкі прадукцыі. Вырашчаныя тут грыбы шыітаке і вешанкі кансервуюцца і сушацца. Створана база прамысловай перапрацоўкі 2,5 млн умоўных бляшанак кансерваў у год. Наладжана таксама перапрацоўка, уключаючы квашанне і саленне. Прадпрыемства арганізавала фірменны гандаль уласнай прадукцыяй.
За 6 месяцаў гэтага года прадпрыемства атрымала Br45,2 млрд выручкі. Прыбытак склаў Br2,4 млрд, рэнтабельнасць продажаў — 5,3 працэнта. Як было даложана Прэзідэнту, у цэлым у краіне для патрэб прамысловай перапрацоўкі нарыхтавана 18,3 тыс.т агародніны, або больш за 38 працэнтаў задання. Што датычыцца вытворчасці грыбоў, яна наладжана ва ўсіх абласцях краіны. У гэтым годзе іх вытворчасць узрасла. У прыватнасці, за 7 месяцаў вырашчана 1,5 тыс.т грыбоў, у тым ліку ў Гомельскай вобласці 47 т. Што датычыцца лясных грыбоў, то ў мінулым годзе іх было нарыхтавана 7,6 тыс.т, з якіх перапрацавана 3,2 тыс.т, экспартавана 4,1 тыс.т лісічак.
Прэзідэнт Беларусі пазітыўна ацаніў вопыт дзейнасці камбіната "Усход" па вытворчасці і перапрацоўцы агародніны і грыбоў. Ён падкрэсліў, што вопыт гэтага прадпрыемства неабходна распаўсюджваць і ў іншых рэгіёнах краіны, наладжваючы там падобным чынам вытворчасць, перапрацоўку, захоўванне і рэалізацыю агародніннай прадукцыі. "Трэба ўсе вобласці арыентаваць на будаўніцтва цэнтраў па захоўванні і перапрацоўцы такой прадукцыі", — запатрабаваў кіраўнік дзяржавы.