Ярмошына едзе ў Вену не па запрашэнні АБСЕ

Ярмошына едзе ў Вену з уласнай ініцыятывы, а не па запрашэнні. Пра гэта распавёў Еўрарадыё прэс-сакратар БДІПЧ АБСЕ Томас Рымер.

Томас Рымер: “Магу пацвердзіць, што Ярмошына зарэгістравалася на мерапрыемства. Але яна не атрымоўвала запрашэння ад АБСЕ. Удзел у мерапрыемстве вольны для грамадскасці і асобаў, якія прадстаўляюць НДА. Любы зацікаўлены, хто можа ўнесці свой унёсак, можа зарэгістравацца анлайн, а пасля наведаць канферэнцыю”.

На думку Томаса Рымера, пра шэнгенскую візу Лідзіі Ярмошынай "лепш запытацца ў аўстрыйскім ўрадзе, які вырашае выдаваць візу ці не". Рымер выказаў меркаванне, што Лідзія Ярмошына і Мікалай Лазавік маглі атрымаць візы ў аўстрыйскай амбасадзе ў Мінску. Што цікава, у Мінску ёсць толькі аўстрыйскае консульства, якое не займаецца выдачай візаў.

Нагадаем, раней стала вядома, што неўязныя ў ЕС старшыня беларускага Цэнтрвыбаркама Лідзія Ярмошына, а таксама сакратар арганізацыі Мікалай Лазавік атрымалі шэнгенскія візы. Як паведаміў Мікалай Лазавік, іх афіцыйна запрасілі ў Вену на канферэнцыю АБСЕ “Дэмакратычныя выбары і назіранне за імі”, якая адбудзецца 12-13 ліпеня.

Пазней Мікалай Лазавік адмовіўся ехаць у Вену. А Лідзія Ярмошына заявіла БЕЛТА, што сёлета Цэнтрвыбаркам паставіў умову: "альбо ад Беларусі ў нарадзе будзе ўдзельнічаць кіраўніцтва ЦВК, альбо ніхто".