Асаблівая дата ў лёсе нашай Радзімы
Таварышы салдаты, сяржанты, прапаршчыкі і афіцэры!
Паважаныя суайчыннікі і госці сталіцы!
Дарагія ветэраны!
Традыцыйна 3 ліпеня мы адзначаем Дзень Незалежнасці Рэспублікі Беларусь.
Па волі нашага народа галоўнае свята беларускай дзяржаўнасці ўстаноўлена ў дзень вызвалення рэспублікі ад гітлераўскіх захопнікаў.
Гэта дата займае асаблівае месца ў лёсе нашай Радзімы.
Усё менш відавочцаў той страшнай вайны застаецца з намі. Але памяць аб гераічных абаронцах Радзімы жыве і будзе жыць у сэрцах новых пакаленняў.
Адстаяўшы свабоду і незалежнасць Айчыны, беларускі народ унёс вялікі ўклад у разгром фашызму, праяўляючы нязломную волю, смеласць і сілу духу.
Тут, на нашай зямлі, захопнікі сутыкнуліся з супраціўленнем, якога не сустракалі ні ў адной з ваенных кампаній.
Мужнасць і гераізм чырвонаармейцаў, праяўленыя ў жорсткіх баях, пахавалі планы маланкавага захопу краіны.
У гісторыі барацьбы за незалежнасць яшчэ не было прыкладаў такога масавага руху супраціўлення. Па маштабнасці дзеянняў, колькасці, узроўню кіравання ён у поўнай меры адпавядаў параметрам рэгулярнай арміі.
Гэта быў сапраўдны другі фронт у тыле ворага.
Мы памятаем, якім каласальным напружаннем сіл, цаной якіх небывалых ахвяр і разбурэнняў дасталася нам свабода і незалежнасць.
Беларусы не скарыліся акупантам і разам з іншымі брацкімі народамі Савецкага Саюза дабіліся Вялікай Перамогі ў гэтай самай бязлітаснай і кровапралітнай вайне дваццатага стагоддзя.
Сёння ў суверэннай Беларусі забяспечаны мір і стабільнасць. Мы выпрацавалі сваю ўласную мадэль развіцця.
Наша краіна з'яўляецца паўнапраўным і актыўным членам міжнароднага супольніцтва, праводзіць шматвектарную знешнюю палітыку.
Актыўна развіваецца ўсебаковае супрацоўніцтва з нашым галоўным стратэгічным партнёрам — Расійскай Федэрацыяй, іншымі дружалюбнымі дзяржавамі.
Робяцца канкрэтныя захады па ўмацаванні раўнапраўных узаемаадносін з заходнімі краінамі.
Менавіта паслядоўны міралюбны знешнепалітычны курс Беларусі з'яўляецца важнейшым фактарам стратэгічнага стрымлівання агрэсіі ў адносінах да нашай краіны.
Мы бачым, што свет пастаянна перажывае ўзрушэнні. Трагічнымі спадарожнікамі чалавецтва, у тым ліку і на сучасным этапе, з'яўляюцца войны і ўзброеныя канфлікты.
У гэтых умовах Беларусь прымае неабходныя меры па стварэнні цэласнай і эфектыўнай сістэмы абароны краіны, а Узброеныя Сілы прыведзены ў адпаведнасць з новымі выклікамі і пагрозамі ХХІ стагоддзя.
Мы ажыццяўляем ваеннае будаўніцтва, накіраванае на павышэнне абароннага патэнцыялу Саюзнай дзяржавы. Паспяхова функцыянуе сумесная групоўка войскаў Расіі і Беларусі ва Усходне-Еўрапейскім рэгіёне, а для аховы паветраных граніц створана адзіная сістэма проціпаветранай абароны.
Удзел у нашым парадзе афіцэраў і салдат Узброеных Сіл Расіі стаў ужо добрай традыцыяй. Увасабляючы адзінства двух народаў, сёння ў гэтым страі плячо ў плячо з беларускімі ваеннаслужачымі стаяць прадстаўнікі расійскай арміі.
Нашы краіны выказваюць цвёрдую рашучасць забяспечыць сваю ваенную бяспеку ўсімі існуючымі ў іх распараджэнні сіламі і сродкамі.
Мы ведаем, што цяпер, як правіла, знешнія пагрозы праяўляюцца праз унутраныя крыніцы.
Але любыя спробы пасеяць у нашай краіне хаос, ажыццявіць палітычныя перавароты або нейкія "каляровыя рэвалюцыі" зусім бесперспектыўныя.
Мы паказалі ўсяму свету, як трэба абараняць нацыянальныя інтарэсы. Беларусы канчаткова зрабілі свой выбар на карысць сапраўднай незалежнасці, падтрымаўшы палітычны курс дзяржавы. Гэтыя заваяванні мы захаваем і ў далейшым!
Паважаныя ветэраны!
Сваім прыкладам вы даказалі, што ў беларускага народа быў, ёсць і заўсёды будзе вялікі запас трываласці.
Нізкі паклон і глыбокая ўдзячнасць усім вам!
Дарагія суайчыннікі!
У гэты свяшчэнны для ўсяго беларускага народа дзень жадаю вам шчасця, міру, дабра і дабрабыту!
Вечная слава героям, якія загінулі ў баях з ворагам і аддалі свае жыцці за свабоду і шчасце будучых пакаленняў!
З Днём Незалежнасці вас, дарагія таварышы!
Ура!