Аляксандр Лукашэнка спадзяецца, што "Залатая шайба" адкрые многім юным ігракам дарогу ў вялікі спорт

Прэзідэнт Беларусі Аляксандр Лукашэнка накіраваў прывітанне ўдзельнікам рэспубліканскіх спаборніцтваў па хакеі сярод дзяцей і падлеткаў "Залатая шайба".

Аляксандр Лукашэнка адзначыў, што ў Беларусі гэта адзін з самых папулярных і прадстаўнічых дзіцяча-юнацкіх спартыўных турніраў. Многія знакамітыя хакеісты пачыналі свой трыумфальны шлях менавіта з такіх спаборніцтваў.

"Маладым ігракам трэба сёння стаць галоўнымі дзеючымі асобамі яркага свята. Спадзяюся, што для многіх з вас гэты турнір адкрые дарогу ў вялікі спорт, — гаворыцца ў прывітанні. — У напружанай спаборніцкай барацьбе праяўляюцца лепшыя якасці асобы — баявы характар, сіла волі, смеласць і калектывізм. Вы заўсёды павінны памятаць, што згуртаванасць каманды з'яўляецца залогам яе паспяховага выступлення".

Прэзідэнт пажадаў усім удачы, дастойных перамог, прыгожых і відовішчных спартыўных паядынкаў.