Партыя “Зялёныя”, ПБНФ і рух “За Свабоду” распачынаюць кампанію “Народны кантроль — за сумленныя выбары!”

Беларуская партыя “Зялёныя”, Партыя БНФ і рух “За Свабоду” распачынаюць кампанію “Народны кантроль — за сумленныя выбары!”, прымеркаваную да выбараў у Палату прадстаўнікоў.

Асноўная задача кампаніі — прыцягненьне грамадзян да ўдзелу ў выбарчых камісіях і ў якасьці назіральнікаў.

Усе суб’екты кампаніі “Народны кантроль — за сумленныя выбары!” зьяўляюцца зарэгістраванымі агульнанацыянальнымі арганізацыямі, якія могуць самастойна вылучаць прэтэндэнтаў на ўдзел у камісіях і назіральнікаў па ўсёй Беларусі на ўсіх акругах. Пры належнай актыўнасьці грамадзян ёсьць магчымасьць “закрыць” сяброўствам у выбарчых камісіях і назіраньнем усе 110 акругаў.

Сваімі сіламі Беларуская партыя “Зялёныя”, Партыя БНФ і рух “За Свабоду” разьлічваюць патрапіць у выбарчыя камісіі, у тым ліку і ў Цэнтральную камісію па выбарах і рэфэрэндумах, і ў назіральнікі на 25-30% акругаў. Гаворка вядзецца пераважна пра тыя акругі, дзе будуць балятавацца кандыдаты, якіх удзельнікі кампаніі падтрымаюць паводле блізкасьці поглядаў і якія возьмуць на сябе абавязальніцтвы зьняцца за некалькі дзён да галасаваньня, калі ў краіне застануцца на той момант палітзьняволеныя.