У Беларусі неабходна актывізаваць прыватызацыю дзяржпрадпрыемстваў
Аб гэтым заявіў учора на пасяджэнні калегіі Дзяржаўнага камітэта па маёмасці намеснік прэм'ер-міністра Беларусі Сяргей Румас, перадае карэспандэнт БЕЛТА.
"У Беларусі неабходна актывізаваць працэсы рэфармавання структуры дзяржаўнай уласнасці. Чым раней мы гэта пачнём рабіць, тым больш у нас шанцаў развівацца хутчэй, па сучасных сусветных тэхналогіях. І прыватызацыя — гэта вельмі важная крыніца такога развіцця", — адзначыў Сяргей Румас.
У 2011 годзе прададзены дзяржаўныя пакеты акцый 34 акцыянерных таварыстваў, што амаль у 7 разоў больш, чым у 2010 годзе. Аднак гэта складае толькі 19 працэнтаў ад агульнай колькасці таварыстваў, запланаваных да прыватызацыі ў 2011 годзе. "Такім чынам, па сутнасці, вынікі рэалізацыі плана прыватызацыі зусім не суцяшальныя і, калі прама сказаць, правальныя", — канстатаваў віцэ-прэм'ер.
Адна з прычын такіх вынікаў — непаваротлівасць асобных міністэрстваў і канцэрнаў. "Разам з тым не відаць роля Дзяржкаммаёмасці як каардынатара работы ў працэсе рэфармавання адносін уласнасці, не прапануюцца новыя прагрэсіўныя ідэі, што канкрэтна трэба зрабіць. Такія прагрэсіўныя меры і павінны быць выпрацаваны па выніках сённяшняй калегіі", — лічыць Сяргей Румас.
Дзяржкаммаёмасць паставіла перад сабой даволі амбіцыйную задачу па продажы ў 2012 годзе 133 прадпрыемстваў, у тым ліку гэта 83 аб'екты прыватызацыі, не прададзеныя раней, паведаміў намеснік прэм'ер-міністра. "Улічваючы, што ўключаныя ў гэты план прадпрыемствы адносяцца ў асноўным да малаэфектыўных, у тым ліку да стратных, відавочна, што зноў могуць узнікнуць тыя ж праблемы з рэалізацыяй дзяржаўных пакетаў акцый гэтых таварыстваў. Як будзе вырашацца гэта задача? Неабходна выпрацаваць эфектыўны механізм ужо сёння. Урад гатовы разгледзець абгрунтаваныя прапановы. Галоўнае — паскорыць работу дзяржаўных органаў пры прыватызацыі дзяржаўных прадпрыемстваў", — сказаў ён.
Закранаючы пералік аб'ектаў, прыватызацыя якіх дасць магчымасць у 2012 годзе прыцягнуць не менш як $2,5 млрд, Сяргей Румас адзначыў: "Гэта пытанне даволі складанае і неадназначнае, але яго трэба вырашаць. У суботу на нарадзе ў прэм'ер-міністра мы павінны ўнесці ўзгоднены і прапрацаваны пералік".
Закрануў намеснік прэм'ер-міністра і пытанне ўключэння ў гаспадарчы абарот дзяржаўнай маёмасці. У 2011 годзе па рэспубліканскай уласнасці ўключаны ў гаспадарчы абарот 61 працэнт ад запланаванага. "Гэта сведчыць аб адсутнасці механізму паслядоўнага вызвалення ад неэфектыўнай і невыкарыстоўваемай маёмасці. У гэтай частцы Дзяржкаммаёмасці неабходна пераходзіць да пазіцыі лідара і заняць месца асноўнага дзяржаўнага органа па каардынацыі і актывізацыі гэтай дзейнасці, стаць ініцыятарам фарміравання новых механізмаў рэгулявання гэтага пытання", — сказаў Сяргей Румас . Ён нагадаў аб задачы поўнага ўключэння ў 2012 годзе ў гаспадарчы абарот дзяржаўнай маёмасці і яе эфектыўнага выкарыстання.
Віцэ-прэм'ер таксама закрануў праблему выкарыстання аб'ектаў былых ваенных гарадкоў, колькасць якіх вялікая. У 2011 годзе план выкананы толькі на 62 працэнты. "Неабходна шукаць шляхі больш актыўнага прыцягнення недзяржаўных структур у развіццё гэтых адасобленых тэрыторый. Урад чакае ад Дзяржкаммаёмасці прапаноў па прыцягненні інвестараў з выкарыстаннем асаблівых умоў комплекснага задзейнічання такіх аб'ектаў", — адзначыў Сяргей Румас. Падобныя праблемы выяўляюцца пры навядзенні парадку на тэрыторыі былых піянерскіх лагераў і месцаў адпачынку.
Не варта пускаць на самацёк і пытанні ўзаемадзеяння з прадпрымальніцкімі структурамі, лічыць ён. "Дзяржкаммаёмасці сумесна з дзяржорганамі неабходна канструктыўна прапрацоўваць кожную прапанову бізнэс-саюзаў па арганізацыі дзейнасці на канкрэтных аб'ектах у цесным узаемадзеянні з прадпрымальнікамі, гатовымі выкарыстоўваць гэтыя аб'екты", — сказаў Сяргей Румас.