У Беларусі дастаткова наяўнай валюты

Пра гэта паведаміла на сустрэчы з працоўным калектывам Віцебскага гарадскога клінічнага радзільнага дома № 1 старшыня праўлення ААТ «ААБ Беларусба нк» Надзея Ермакова падчас правядзення ў Віцебску Адзінага дня інфармавання «2011 год — Год прадпрымальнасці», перадае БЕЛТА.

«На рынку цалкам дастаткова наяўнай валюты — долараў, еўра, расійскіх рублёў. Праблема ў іх выдачы з'яўляецца толькі тэхнічнай, — сказала Надзея Ермакова. — Напрыклад, толькі на рахунках Беларусбанка захоўваецца больш за $3 млрд. Пры гэтым уклады насельніцтва складаюць усяго $600 млн. Таму грошы ёсць, але аддаць іх за адзін дзень мы проста фізічна не можам».

Надзея Ермакова таксама падкрэсліла, што структуры банкаўскай сістэмы Беларусі пастаянна працуюць па дагаворах з замежнымі банкамі, дзе заўсёды могуць падмацавацца патрэбнай валютай. «Аднак рабіць вялікія запасы проста так, адцягнуць і замарозіць рэсурсы нельга, паколькі гэта непрактычна і няправільна», — растлумачыла старшыня праўлення банка. Закранаючы прычыны, якія справакавалі ажыятаж вакол валюты, Надзея Ермакова адзначыла, што актыўны попыт на грашовыя рэсурсы прыпаў на выхадныя дні, калі ў банках скарочаныя рабочыя дні, у некаторых — выхадны, не працавала інкасацыйная служба. У ліку такіх прычын старшыня праўлення Беларусбанка назвала таксама раздутыя чуткі аб дэвальвацыі нацыянальнай валюты і сітуацыю, якая склалася ў сувязі з увядзеннем увазных мытных пошлін на аўтамабілі з 1 ліпеня. «Рэакцыяй стаў масавы паход насельніцтва за набыццём машын, для чаго людзі і здымалі свае ўклады ў банках. Далей пайшла ланцуговая рэакцыя: убачыўшы чаргу ў абменніках, іншыя таксама вырашылі зняць свае зберажэнні на ўсякі выпадак. Асаблівага страху ў тым, што цяпер адбываецца, няма, пройдзе час — усе супакояцца і зноў панясуць свае грошы назад у банкі», — рэзюмавала Надзея Ермакова.