Лявонаў звярнуўся да Лукашэнкі з адкрытым лістом
У сваім звароце, які надрукавала «Народная воля», Лявонаў згадвае пра злачынствы рэжыму Лукашэнкі і заклікае яго адмовіцца ад займаемай пасады падчас Усебеларускага сходу.
«Спадар прэзідэнт!» — такімі словамі пачынаецца адкрыты ліст Лявонава да Лукашэнкі. Ён піша, што гэта ўжо другі яго ліст да кіраўніка дзяржавы (першы быў дасланы з турмы). Адзначае, што абавязаны расказаць людзям праўду аб рэжыме Лукашэнкі, бо тыя, хто мог бы гэта зрабіць, знішчаныя «эскадронамі смерці». «І я гавару гэтую праўду. І беларускаму народу… І вам», — піша Лявонаў.
У сваім адкрытым лісце былы міністр сельскай гаспадаркі абвінавачвае Лукашэнку ў няправільным кіраванні краінай на працягу ўсіх 16 гадоў. Ён звязвае ўсе поспехі, дасягнутыя ў гэты час, з дапамогай Расіі.
«Расія перастае аплачваць вашу заганную палітыку ў гаспадарцы. Замены гэтай шчодрай расійскай душы няма. Што далей. Шукаць замену? Але дзе можна знайсці такую халяву?», —пытаецца В.Лявонаў у Лукашэнкі.
Шмат увагі надаецца ў лісце справам зніклых палітыкаў. Васіль Лявонаў расказвае, як у Менску ледзьве не адбыўся ўзброены канфлікт паміж рознымі спецслужбамі, а таксама вінаваціць Лукашэнку ў жаданні адстойваць уладу нават коштам чалавечых жыццяў.
Завяршаецца зварот Лявонава да Лукашэнкі прапановай сысці з пасады. «На будучым Усенародным сходзе папрасіце прабачэння ў людзей за свае памылкі. Паверце, што яны даруюць вам. Даруюць і тым, хто аддана выконваў усе вашы указанні», — піша Лявонаў. Былы міністр сельскай гаспадаркі таксама просіць Лукашэнку зрабіць тое, што яму параіў Уладзімір Някляеў (адмовіцца ад удзелу ў выбарах і дазволіць беларусам сустрэць Новы год з іншым прэзідэнтам). Пасля гэтага, на думку В.Лявонава, Лукашэнка павінен «стаць на калені і аддзячыць Расіі за тое, што яна ў складаныя гады працягнула руку дапамогі».
Алесь Пілецкі