Павел Шарамет: “Я б гэта назваў тлустай чорнай меткай Лукашэнку”

На расейскім канале НТВ у нядзелю ўвечары, у прайм-тайм, паказалі дакумэнтальны фільм «Хросны бацька». У Беларусі фільм перакрылі.Адначасова з выкрыцьцём Аляксандра Лукашэнкі выступіў і дзяржаўны тэлеканал Russia Today, на якім паказалі ролік пад назовам «Hard Luka».

А сайт inosmi.ru падае відэа і стэнаграму сюжэту пад назовам «Апошні дыктатар Эўропы». Цікава, што ўсё гэта адбылося перад самітам кіраўнікоў Расеі, Казахстану і Беларусі ў Астане.

У тытрах перад фільмам «Хросны бацька» паведамляецца, што фільм быў зьняты яшчэ год таму, але беларускія спэцслужбы затрымалі здымачную групу і канфіскавалі касэты. Аднак «у Менску знайшліся людзі, якім удалося знайсьці іх у сэйфах КДБ і вярнуць НТВ».

Аўтара як асобы, якая бярэ інтэрвію, размаўляе зь людзьмі, у фільме няма — дыктар чытае закадравы тэкст. У панядзелак раніцай «Хросны бацька» зьявіўся на шмат якіх сайтах і паглядзець яго можа кожны ахвотны.

Журналіст Павел Шарамет, аўтар фільмаў «Дзікае паляваньне» і «Дзікае паляваньне. Працяг», суаўтар кнігі «Выпадковы прэзыдэнт», ня так даўно пазбаўлены беларускага грамадзянства, выказаў такое меркаваньне:

«Нават я быў уражаны тонам праграмы на НТВ, падборам фактаў, падборам „карцінак“. Ведаючы правілы прыняцьця рашэньня на расейскіх каналах, я выключаю, што гэта выпадковасьць, якая тлумачыцца асабістым стаўленьнем канкрэтна аўтараў фільму да прэзыдэнта Беларусі. Больш за тое, паколькі паралельна на іншых расейскіх каналах таксама выходзілі даволі жорсткія сюжэты пра Лукашэнку, я бачу, што ўсё гэта нагадвае элемэнты скаардынаванай новай інфармацыйнай палітыкі ў дачыненьні да Лукашэнкі».

Адзін з аўтараў фільму — журналіст НТВ Аляксей Малкоў. У жніўні 2009 году ён быў дэпартаваны зь Беларусі разам з апэратарам Юрыем Бабенкам. Яны працавалі ў Менску, здымалі фільм пра зьніклых. Але за здымачнай групай сачылі беларускія спэцслужбы, карэспандэнтаў вывезьлі ў лес, дапыталі, забралі ўсе касэты, а саміх адправілі ў Воршу. Афіцыйная падстава — быццам бы яны працавалі без акрэдытацыі. У фільме шмат архіўных матэрыялаў, якія гледачы ўжо бачылі ў «Дзікіх паляваньнях» Паўла Шарамета і ў «Звычайным прэзыдэнце» Юрыя Хашчавацкага. Спадар Хашчавацкі высока ацаніў фільм, назваўшы яго, з аднаго боку, надзвычай прафэсійным, а з другога — чыста прапагандысцкім. Ён прызнаўся, што перадаў частку сваіх матэрыялаў расейскім калегам і што расейцам працаваць над такім фільмам значна лягчэй, чым беларусам:

Юры Хашчавацкі «Гэты фільм зрабіць нашмат лягчэй расейцам, чым зрабіць найпрасьцейшы сюжэт нашым маладым калегам на „Белсат“, за якімі адразу ганяюцца, прыходзяць зь ператрусам, адбіраюць камэры. Гэты фільм рабіўся ў спакойных абставінах з дазволу вышэйшых уладаў Расеі. Што, увогуле, само па сабе цікава. І не прымяншае значэньня гэтага фільму для нас. Ён вельмі важны».

Зьвязацца з адным з асноўных аўтараў фільму не ўдалося. Аляксей Малкоў — асоба вядомая ў расейскіх тэлевізійных колах. Ён атрымаў ордэн Пашаны ў Крамлі з рук тагачаснага прэзыдэнта Пуціна. Гэта адбылося пасьля створаных ім фільмаў «Чалавек зь мятлой», «Тэракт зь перадаплатай» і «Банды зь ЮКАСу», прысьвечаных Юшчанку, Беразоўскаму і Хадаркоўскаму. Пасьля ён зьняў фільм «Хто замаўляе хаос» — пра Каспарава.

Што азначае выхад гэтага фільму ды іншых вострых матэрыялаў на расейскіх каналах? Павел Шарамет, аўтар фільмаў «Дзікае паляваньне», суаўтар кнігі «Выпадковы прэзыдэнт» выказаў такое меркаваньне:

«Я ня думаю, што гэта пачатак канца беларускага прэзыдэнта і дружбы паміж Лукашэнкам і Крамлём. Я б гэта назваў тлустай чорнай меткай. Гэта апошняе „кітайскае папярэджаньне“ беларускаму прэзыдэнту, пасьля якога, калі ён ня зробіць высноваў, могуць быць зроблены нейкія іншыя дзеяньні».