Беларусь не мае намеру мяняць мiжнародныя прыярытэты дзеля скарацечнай i сумнiўнай выгады
Мiжнародныя прыярытэты Беларусь дакладна вызначыла, зыходзячы з нацыянальных iнтарэсаў, i мяняць iх для атрымання скарацечнай i сумнiўнай выгады не мае намеру. Аб гэтым заявiў Прэзiдэнт Беларусi Аляксандр Лукашэнка ў Вiльнюсе на V Беларуска-лiтоўскiм мiжнародным эканамiчным форуме.
Як адзначыў Прэзiдэнт, Беларусi спрабуюць навязаць нейкi выбар памiж Еўропай i Расiяй, сцвярджаючы аб несумяшчальнасцi гэтых двух вектараў. "Лiчу такую пастаноўку пытання няправiльнай, — сказаў Аляксандр Лукашэнка. — Наша прынцыповая пазiцыя — быць сувязным мостам памiж Усходам i Захадам". I для гэтага, упэўнены кiраўнiк беларускай дзяржавы, у Беларусi ёсць усе ўмовы: як геаграфiчныя, так i культурныя, эканамiчныя i нават палiтычныя.
У той жа час Аляксандр Лукашэнка адзначыў, што Беларусь гатова прыслухоўвацца да чужых думак: "Мы разумныя людзi, мы ўмеем слухаць. I калi нам параяць нешта талковае, то мы скарыстаемся гэтай парадай". Прэзiдэнт падкрэслiў, што з'яўляецца прыхiльнiкам адкрытай палiтыкi i нiколi нiкога не падводзiў. "Мы — суверэнная краiна, у нас няма тых абавязацельстваў, якiя ёсць у вас перад Еўрасаюзам. Мы больш свабодныя ў сваiх рашэннях, i вы можаце разлiчваць, што калi мы дамовiлiся, то абавязкова выканаем усе дамоўленасцi", — сказаў кiраўнiк беларускай дзяржавы.
Гаворачы аб праведзеных перагаворах у вузкiм фармаце, Аляксандр Лукашэнка адзначыў, што ўдалося абмеркаваць усе пытаннi адкрыта, сумленна i прынцыпова. "Мне спадабалася адкрытасць нашага дыялога. Мне падабаецца, калi адкрыта выкладаюць сваю пазiцыю па вострых пытаннях. Час пакажа. Паглядзiм, хто будзе мець рацыю па тых вострых пытаннях, якiя Еўропа ставiць перад намi", — дадаў ён. У той жа час Аляксандр Лукашэнка лiчыць, што ў адносiнах Беларусi i Лiтвы няма нейкiх праблемных момантаў.
Аляксандр Лукашэнка падкрэслiў, што беларускi бок разумее, што ў Лiтвы як члена Еўрапейскага саюза ёсць пэўныя абавязацельствы. "Я разумею гэта, i калi Польшчы або Лiтве нязручна весцi з намi дыялог, вы толькi скажыце", — сказаў беларускi лiдар. На яго думку, у Беларусi i Лiтвы ёсць надзейны фундамент, якi змацоўвае ўсё, — гэта эканомiка. Прэзiдэнт запэўнiў, што Беларусь поўная рашучасцi рэалiзаваць многiя эканамiчныя праграмы i пераадолець розныя перашкоды на шляху iх выканання.
Прэзiдэнт Лiтвы ў сваю чаргу адзначыла, што на сустрэчы былi закрануты асноўныя пытаннi супрацоўнiцтва з Беларуссю: узаемадзеянне па розных напрамках у эканомiцы, у энергетычным сектары, культуры, магчымыя i будучыя двухбаковыя праекты. Яна падкрэслiла, што ўсе пазiцыi па палiтычных, эканамiчных напрамках узгоднены з усiмi краiнамi — членамi Еўрасаюза. "Таму ў нашай асобе вы чуеце i голас еўрапейскай супольнасцi", — адзначыла Даля Грыбаўскайтэ. Гаворачы аб правядзеннi ў Лiтве Нацыянальнай выставы Беларусi i беларуска-лiтоўскага эканамiчнага форуму, Прэзiдэнт Лiтвы адзначыла, што гэта будзе добрым крокам да паглыблення эканамiчных адносiнаў i зблiжэння ў палiтычнай сферы.
Беларусь чакае знiжэння кошту шэнгенскiх вiзаў i аблягчэння вiзавых фармальнасцяў з ЕС, заявiў Аляксандр Лукашэнка. Уваходжанне Польшчы i краiн Балтыi ў шэнгенскую зону iстотна абмежавала магчымасцi беларусаў кантактаваць з суседзямi. Беларусь застаецца адзiнай краiнай у Еўропе, для грамадзян якой шэнгенская вiза каштуе 60 еўра. На думку беларускага лiдара, такая сiтуацыя абсалютна непрымальная i супярэчыць заявам аб тым, што развiццё мiжасобасных кантактаў з'яўляецца адной з ключавых мэтаў аб'яднанай Еўропы.
Як падкрэслiў Прэзiдэнт, у гэтым пытаннi Беларусь асаблiва разлiчвае на актыўнае садзейнiчанне Лiтвы, паколькi гэта праблема непасрэдна закранае адносiны памiж беларусамi i лiтоўцамi, значна стрымлiвае развiццё культурнага абмену, турызму i гандлю.
Аляксандр Лукашэнка з задавальненнем адзначыў, што беларусам сумесна з лiтоўскiмi партнёрамi па меры магчымасцi ўдаецца вырашаць гэту праблему на двухбаковай аснове шляхам стварэння спрыяльных умоў для перасячэння гранiцы жыхарамi прыгранiчных раёнаў.
Крызiс павiнен стымуляваць Беларусь i Лiтву да пошуку новых сфер узаемадзеяння, рэалiзацыi тых праектаў, якiя ў добрыя часы iгнаравалiся з-за адноснай складанасцi iх выканання або не вельмi высокай рэнтабельнасцi, лiчыць Прэзiдэнт.
"Трэба шукаць новыя схемы вытворчай кааперацыi, стварэння зборачных вытворчасцяў, iнвестыцыйнага ўзаемадзеяння", — перакананы кiраўнiк беларускай дзяржавы.
Аднаўленне ўдзелу Беларусi ў Абагульненай сiстэме гандлёвых прэферэнцый Еўрасаюза стала б важным крокам, накiраваным на актывiзацыю гандлю Беларусi i ЕС. Як адзначыў Прэзiдэнт, сёння iснуе шэраг стрымальных фактараў для паставак беларускiх тавараў на рынак ЕС.
Прэзiдэнт Беларусi запрасiў усiх бiзнэсменаў, у тым лiку i лiтоўскiх, да ўзаемавыгаднага супрацоўнiцтва ў транспартна-транзiтнай сферы, распрацоўцы i рэалiзацыi канкрэтных сумесных праектаў. Аляксандр Лукашэнка лiчыць, што магчымасцi для гэтага iснуюць i на двухбаковым узроўнi, i ў рамках мiжнародных праектаў, такiх як "Партнёрства ў галiне транспарту i лагiстыкi ў рэгiёнах Паўночнага змянення", "Янтарны прыбярэжны шлях" Праграмы транснацыянальнага супрацоўнiцтва ЕС "Рэгiён Балтыйскага мора".
Аляксандр Лукашэнка не выключае магчымасцi ўдзелу ў наступных прэзiдэнцкiх выбарах у Беларусi. Аб гэтым Прэзiдэнт Беларусi заявiў у Вiльнюсе, адказваючы на пытаннi журналiстаў.
"На сёння няма прычын, па якiх я адмовiўся б ад удзелу ў выбарах, — сказаў Аляксандр Лукашэнка. — З'явяцца такiя прычыны, буду адчуваць, што "не прахадны", паверце, я не пайду на выбары". Аляксандр Лукашэнка таксама заўважыў, што як толькi настане перадвыбарны перыяд, ён аб'явiць аб сваiм рашэннi.
Гаворачы ў цэлым пра беларускае выбарчае заканадаўства, Прэзiдэнт адзначыў, што яно адпавядае беларускай Канстытуцыi, а апошняя ў сваю чаргу была прызнана Венецыянскай канвенцыяй. "Калi гэта ў рамках Канстытуцыi, то чаму нам нехта збоку павiнен указваць: вы, маўляў, яго змянiце?! Нам таксама, можа, нешта не падабаецца ў выбарчым заканадаўстве Польшчы або Лiтвы, але не давядзi Бог, каб мы прад'яўлялi патрабаваннi", — сказаў кiраўнiк беларускай дзяржавы. Ён нагадаў, што Беларусь ужо тройчы мяняла сваё выбарчае заканадаўства ў тым ключы, як гэтага патрабавала еўрапейская супольнасць. "Калi трэба чацвёрты раз, няхай скажуць, што не падабаецца, — вывучым", — сказаў Прэзiдэнт.
Што датычыцца таго, што сваё нездавальненне наконт гэтага выказвае АБСЕ, то, лiчыць Прэзiдэнт, гэта пытанне не ў кампетэнцыi гэтай арганiзацыi. "АБСЕ — арганiзацыя бяспекi i супрацоўнiцтва i не мае нiякiх адносiнаў да выбараў. Але мы прапанавалi АБСЕ: давайце вызначым крытэрыi для ўсiх i па iх будзем ацэньваць i заканадаўства, i выбары", — адзначыў Аляксандр Лукашэнка. Паводле яго слоў, АБСЕ па-ранейшаму выкарыстоўвае дваiстасць падыходаў да ацэнкi выбараў i вялiкую палiтызаванасць гэтага пытання.
Аляксандр Лукашэнка расказаў журналiстам, што, калi еўрапейцы выказалi нездавальненне вынiкамi апошнiх прэзiдэнцкiх выбараў, ён прапанаваў еўрапейцам самiм арганiзаваць i правесцi выбары ў Беларусi. "Плацiце грошы: $15 млн — невялiкая для вас сума, арганiзуйце выбары ў Беларусi. Iх вынiкi будуць для мяне закон. Яны не прыехалi, бо ведалi iх вынiк", — адзначыў кiраўнiк дзяржавы. Ён таксама дадаў, што гэта цалкам унутраная справа Беларусi.
Прэзiдэнт Беларусi Аляксандр Лукашэнка запрасiў сваю лiтоўскую калегу Далю Грыбаўскайтэ наведаць Беларусь з вiзiтам у адказ. Аб гэтым ён паведамiў у iнтэрв'ю рускамоўнаму штотыднёвiку "Литовский курьер".
Паводле слоў кiраўнiка беларускай дзяржавы, Прэзiдэнт Лiтвы прыняла гэту прапанову. Магчыма, гэта пытанне яна вымушана будзе ўзгаднiць з Бруселем, дадаў Аляксандр Лукашэнка.
Ён таксама падкрэслiў, што ў беларусаў няма абсалютна нiякiх прэтэнзiй да лiтоўцаў, i ад двухбаковага супрацоўнiцтва народы будуць толькi багацейшыя.
Паводле паведамленняў прэс-службы Прэзiдэнта
Рэспублiкi Беларусь і БЕЛТА.
Каментарыяў: 0 Даслаць каментарый |