Выкладчык рускай мовы і літаратуры СШ №2 імя К.П.Арлоўскага Надзея Комар стала лаўрэатам (па суме набраных балаў заняла трэцяе месца) абласнога этапа конкурсу прафесійнага майстэрства “Настаўнік года Рэспублікі Беларусь” у намінацыі “Руская мова і літаратура, беларуская мова і літаратура”. За права быць лепшымі ў гэтай намінацыі змагаліся 24 педагога з розных куткоў Магілёўшчыны.
У студзені Надзея Комар стала лідарам у раённым туры “Настаўніка года”. “На вобласць” паехала добра падрыхтаванай, з грунтоўным багажом ведаў і творчых напрацовак, моцнай падтрымкай калег.
Прафесійнае спаборніцтва педагагічных работнікаў праходзіла на базе Магілёўскага дзяржаўнага абласнога інстытута развіцця адукацыі, доўжылася 5 дзён. За гэты час канкурсанты прадстаўлялі і абаранялі вопыт уласнай педагагічнай дзейнасці; праходзілі тэставанне з мэтай праверкі ведаў у галіне выкладаемага прадмета, а таксама педагогікі і псіхалогіі; дэманстравалі практычныя навыкі ў выкарыстанні сучасных сродкаў навучання; праводзілі адкрытыя ўрокі ў незнаёмых класах і майстар-класы для педработнікаў.
Надзея Комар прадставіла на конкурсе свае напрацоўкі па выкарыстанні ў працэсе вывучэння рускай мовы мнеманічных прыёмаў. Гэта сукупнасць спосабаў, якія аблягчаюць запамінанне правілаў правапісу, павялічваюць аб’ём памяці шляхам фарміравання штучных асацыяцый. Карацей кажучы, каб лягчэй запомніць правілы, выкарыстоўваюцца адпаведныя малюнкі, выразы, рыфмы і інш. Надзея Іванаўна сама распрацавала памяткі, як укараніць у педагагічную дзейнасць мнеманічныя прыёмы, і падарыла іх сваім калегам-канкурсантам.
Рускую мову і літаратуру Н.І.Комар выкладае 6 год. Некалі яна сама была вучаніцай СШ №2 імя К.П.Арлоўскага, і жаданне стаць настаўнікам з’явілася яшчэ ў той час. Параўноўваючы ўмовы навучання ў гады свайго дзяцінства і зараз, малады педагог адзначае: “Безумоўна, вучэбны працэс змяніўся: развіццё тэхналогій робіць інфармацыю больш даступнай, дазваляе даць вучням шмат рознабаковых цікавых ведаў, пашырыць аб’ём вывучаемага”.
Педагог не проста дае рабятам новыя веды, а стараецца прывіць ім любоў да мовы і літаратуры, стварыць творчую атмасферу на ўроках. Зацікавіць кожнага вучня, каб на занятках не было сумна, каб ён разумеў, што яго асабісты ўдзел у працэсе атрымання новых ведаў мае значэнне для ўсяго вучнёўскага калектыву — у гэтым маладая настаўніца бачыць адну са сваіх задач.
Вяртаючыся да ўспамінаў аб конкурсе, Н.І.Комар адзначае, што шчыра ўдзячная сваім калегам за дапамогу пры падрыхтоўцы да прафесійнага спаборніцтва: дырэктару ўстановы адукацыі Г.І.Русецкай і намесніку па вучэбнай рабоце А.М.Каранкевіч, настаўнікам С.Р.Свірко, В.В.Яскевіч, В.В.Сінельнікавай, С.В.Шчарбялёвай.
“Любі тое, што выкладаеш, і любі тых, каму выкладаеш” – гэты выраз з’яўляецца прафесійным крэдам Надзеі Комар. У спалучэнні з жаданнем самаразвівацца, рабіць новыя адкрыцці яно прыводзіць да поспехаў у любімай працы.
На здымку: Надзея Комар падчас урачыстага ўзнагароджвання.
Яўгенія Бялько.