У яслі-садзе № 3 нашага гарадскога пасёлка прайшло мерапрыемства, прысвечанае 80-годдзю Шаркаўшчынскага раёна

Дашкольныя ўстановы, з’яўляючыся пачатковым звяном у сістэме адукацыі, фарміруюць у маленькіх дзяцей  першае ўяўленне аб навакольным свеце, іх  адносіны да роднай прыроды, свайго горада або пасёлка. Поспех патрыятычнага выхавання нашых дзяцей у многім залежыць  ад бацькоў і сям’і, ад той атмасферы, якая пануе дома і ў дзіцячым садку. Сучаснае жыццё дыктуе неабходнасць  звяртаць асаблівую ўвагу на маральныя аспекты ў выхаванні дзяцей. І гэты працэс  трэба фарміраваць з самага ранняга дзяцінства.

З чаго для самых маленькіх жыхароў нашага гарадскога пасёлка пачынаецца радзіма?,-паспрабавалі высветліць ў яслі садзе № 3 г. п. Шаркаўшчына, дзе ў сярэдзіне студзеня надзвычай цікава і займальна прайшло мерапрыемства  “Падарожжа па родным гарадскім пасёлку”, прысвечанае 80-гадоваму юбілею Шаркаўшчынскага раёна.

—          Выхаванне любові да родных мясцін мы пачынаем з самага зразумелага і блізкага, даступнага ўспрыманню дзяцей, -паведаміла загадчыца яслі-сада № 3 нашага гарадскога пасёлка Ірына Аляксееўна  Лагунова. — Выхоўваючы ў дзіцяці любоў да роднага дома, сям’і, дзіцячага садка, мы пачынаем выхоўваць  у яго надзвычай важныя для фарміравання асобы пачуцці. Вось і падчас цікавага мерапрыемства, прысвечанага 80-гадоваму юбілею Шаркаўшчынскага раёна, дзеці шмат даведаліся пра наш гарадскі пасёлак, яго ўстановы і арганізацыі, пазнаёміліся з Шарачком і легендай пра ўзнікненне Шаркаўшчыны. Падчас  мерапрыемства, якое праходзіла ў гульнёвай        форме, зацікавіла маленькіх шаркаўчан  і маляўнічая рака Дзісна, і сімволіка нашага краю, і ўдзел у выставе творчых работ “Штрыхі пасёлка”. Дзецям вельмі спадабалася “Падарожжа па родным гарадскім пасёлку”. Усе яны былі актыўнымі, эмацыянальна ўключыліся ў гульню , з энтузіязміам адгукнуліся на прапанаваныя выхавацелямі заданні, і, у выніку, шмат цікавага даведаліся  пра свой родны край.

Вольга ЧАРНЯЎСКАЯ