Цягнік Мінск-Гомель спыніўся ў дарозе: пасля ўспышак пасажыраў папрасілі выйсці
Здарэнне з цягніком Мінск-Гомель / Telegram-канал NEXTA
Надзвычайнае здарэнне адбылося з цягніком "Штадлер" рэйса Мінск-Гомель увечары 15 снежня. На станцыі Чырвоны Бераг цягнік спыніўся, а ўсіх пасажыраў папрасілі пакінуць вагоны.
У каментары парталу TUT.by пасажырка Дар'я Цуранкова распавяла: "Мы з сяброўкай выйшлі, а бацькі засталіся. У гэты час у другім саставе (цягнік складаецца з двух счэпак. — TUT.by) адбыліся дзве ўспышкі, і ўсіх папрасілі пакінуць вагоны".
У прэс-службе Беларускай чыгункі журналістам заявілі, што цягнік №708 Мінск-Гомель быў спынены па тэхнічных прычынах. На станцыю адправілі дадатковы лакаматыў, каб даставіць пасажыраў да Гомеля.
"Арыенціровачна састаў прыбудзе са спазненнем у 1 гадзіну 30 хвілін. Прычыны тэхнічнай няспраўнасці высвятляюцца. БЧ прыносіць пасажырам свае прабачэнні за дастаўленыя нязручнасці", — дадалі ў прэс-службе.
На станцыі пасажыры прабылі каля дзвюх гадзін. Дадатковы цягнік для іх прыйшоў каля 23:00.
Дарэчы, цягнікі "Штадлер", якія ходзяць у гомельскім напрамку, сёлета ў чэрвені-ліпені ламаліся ўжо двойчы. 16 чэрвеня зламаўся цягнік, які ішоў з Гомеля ў Мінск. 760 пасажыраў затрымаліся ў дарозе амаль на чатыры гадзіны. Адпаведна, не змаглі выехаць і пасажыры, якія купілі ў Мінску квіткі да Гомеля.
А 26 ліпеня ў раёне станцыі Талька зламаўся цягнік, які ехаў з Мінска ў Гомель.