На пажары ў Петрыкаве ратавальнікі эвакуявалі восем чалавек
gomel.mchs.gov.by
Уначы 6 верасня, у 1:49, петрыкаўскіх ратавальнікаў выклікалі на пажар кватэры па вуліцы Розы Люксембург, інфармуе прэс-служба МНС.
Прыбыўшы на месца здарэння, супрацоўнікі МНС пабачылі, што з вокнаў кватэры на пятым паверсе выбіваецца полымя.
36-гадовы гаспадар пражывае ў чатырохпакаёвай кватэры адзін. На момант прыбыцця ратавальнікаў мужчына знаходзіўся на вуліцы. Ён распавёў, што спаў дома і прачнуўся ад паху дыму. Мужчына пабачыў, што ў яго гарыць пасцель і паспрабаваў яе сам патушыць. Потым ён пайшоў на кухню гатаваць, а калі надумаўся вярнуцца ў спальню, там ужо быў агонь. Таму гаспадар выйшаў на вуліцу.
Пры спробе самастойнага тушэння пажару мужчына атрымаў апёкі, медыкі шпіталізавалі яго.
Ратавальнікі эвакуявалі з суседніх кватэраў восем чалавек.
Мяркуецца, што прычынай пажару стала неасцярожнае абыходжанне з агнём пры курэнні гаспадара кватэры.