У Мінску каля крамы ўпала страла мантажнага крана

У Мінску ўпала страла мантажнага крана на гусенічным хаду. Здарэнне адбылося 6 жніўня на вуліцы Якуба Коласа. Кран працаваў на рэканструкцыі аднаго з будынкаў. Раптоўна страла без груза апусцілася ў зону прыёмкі тавара крамы, абаперлася на грузавік і дэфармавала металічную агароджу (відавочцы кажуць, што страла крана падала марудна і людзі змаглі адысці ў бок). Як інфармуе прэс-служба МНС, ніхто з людзей не пацярпеў.

Прычыны здарэння стануць вядомыя пазней. Расследаванне будзе праводзіцца сумесна з прадстаўніком Дзяржпрамнагляду.